Атрымаў Падзяку Прэзідэнта

Поделитесь с друзьями
  •  
  •  
  •  
  •  
  •  
  •  

Чацвёртага лістапада ў Нацыянальнай бібліятэцы Прэм»ер-міністр Рэспублікі  Беларусь М.У. Мясніковіч уручыў  узнагароды шэрагу  прадстаўнікоў  розных сфер народна-гаспадарчага  комплексу краіны. Сярод іх  быў і начальнік  свінагадоўчага комплексу  СВК «Агракамбінат Сноў» І.І. Даўшко. За шматгадовую плённую работу, высокі прафесіяналізм і асабісты ўклад у развіццё аграпрамысловага комплексу ён атрымаў Падзяку Прэзідэнта краіны. Крыху раней Іван Даўшко быў узнагароджаны медалём «За працоўныя заслугі».

У «Снове» Іван Іванавіч — з 1980 года (тады гэта быў калгас імя Калініна). Працаваў заатэхнікам  па свінагадоўлі, заатэхнікам-селекцыянерам у гэтай  жа галіне.

— У той час, — расказвае Іван Даўшко, — у рэспубліцы актыўна будавалі  свінакомплексы, і мы прадавалі для іх  запаўнення  племянных свінак, якіх  вырошчвалі ў сябе. За год — каля 3 тысяч галоў. Зараблялі грошы.

У 1988 годзе  спецыяліста прызначылі начальнікам  свінакомплексу, які з часам стаў сапраўднай фабрыкай  вытворчасці свініны — з навейшымі тэхналогіямі, з выдатнымі ўмовамі для працы аператараў. А племянных свінак  вырошчваюць цяпер у Горным Снове  толькі для ўласных патрэб.

Калі І.І. Даўшко прыйшоў у гаспадарку, тут было крыху больш за 7 тысяч свіней. Цяпер — 31 тысяча. Да канца года мяркуюць  давесці гэты паказчык да 33 тысяч. Сярэднясутачная  прывага свіней на дарошчванні і адкорме складае 640 грамаў, у тым ліку на адкорме — 710 грамаў.  Свініны за 10 месяцаў 2011 года атрымана  5917 тон. А плануюць штогод атрымліваць 7200 тон.

Свінакомплекс у агракамбінаце  пастаянна рэканструіруецца, абнаўляецца. Вось і цяпер будуюць тры  адкормачнікі. Яны прыйдуць на змену старым будынкам, якія служаць з 1974 года. Такім чынам, усе работы на рэстаўрацыі «старажылаў» не адаб»юцца негатыўна на аб»ёмах вытворчасці мяса.

— Мы хочам упэўнена замацавацца  на лічбе 7200 тон. І яшчэ паставілі далейшую задачу — змяншаць затраты, каб свініна стала таннейшай. У вытворчасці працаваць  навучыліся, трэба ўшчыльную  заняцца эканомікай, — апавядае далей Іван Іванавіч.

Свінакомплекс СВК «Агракамбінат Сноў»  займае вядучае месца сярод  аднатыпных прадпрыемстваў Беларусі. І прыемна, што дасягненні  калектыву, яго кіраўніка заўважаны кіраўніцтвам краіны.

— Гэтая ўзнагарода — заслуга і спецыялістаў, і радавых работнікаў, — кажа Іван Іванавіч. — Добры ў нас калектыў. Будзем і далей  працаваць  па поўнай праграме.

Фота Святланы ПОЛЬСКАЙ


Поделитесь с друзьями
  •  
  •  
  •  
  •  
  •  
  •  

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.