Для зручнасці пакупнікоў

На фота: загадчыца магазіна Лілія Елісеенка  абслугоўвае першых пакупнікоў

У канцы мінулага тыдня  аднавіў сваю работу пасля  капітальнага рамонту магазін райспажыўтаварыства ў вёсцы саска Ліпка. Як патлумачыў старшыня  райспажыўтаварыства Сяргей Лапко, год таму магазін быў закрыты  як нерэнтабельны, але зараз кааператыўны гандаль, згодна з праграмай развіцця  спажыўкааперацыі, вяртаецца ў многія вёскі, дзе стварае здаровую  канкурэнцыю прыватнікам.

Сапраўды, абноўленая гандлёвая кропка  мае вельмі прывабны выгляд як звонку, так і ўнутры. Светлыя, аптымістычныя колеры афармлення, зручная выкладка тавараў і, галоўнае, багаты асартымент адразу прывабілі пакупнікоў. Знайсці тут можна  не толькі  разнастайныя прадукты, але і  гаспадарчыя тавары — ад посуду да бытавой хіміі.

Прадаецца тут прадукцыя нашых беларускіх вытворцаў, таму і цэны даволі  прымальныя на ўсё — ад прадуктаў да  мыйных сродкаў.

Па заяўках насельніцтва ў магазін прывязуць  і складаную бытавую тэх-ніку, і будматэрыялы.

Працаваць гандлёвая кропка будзе  з 8 гадзін раніцы да 21-й вечара без выхадных і перапынкаў на абед, што таксама зручна  для пакупнікоў. А сустракаць  іх будуць загадчыца магазіна Лілія  Елісеенка і прадавец  Таццяна Елісеенка, мясцовыя жыхаркі, якія пастараюцца, як запэўніла Лілія Мікалаеўна, каб землякі выходзілі з магазіна,  задаволеныя пакупкамі і з добрым настроем.

Фота Святланы ПОЛЬСКАЙ