У памяць пра мастака

Поделитесь с друзьями
  •  
  • 1
  •  
  •  
  •  
  •  

Журналіст, мастацтвазнаўца і краязнаўца Валеры Дранчук уручае навуковаму супрацоўніку Нясвіжскага гісторыка-краязнаўчага музея Ірыне Калібабе кнігу “Краявіды. Жывапіс”, прысвечаную творчасці мастака Івана Дмухайлы, якую ён у свой час падрыхтаваў да друку

Журналіст, мастацтвазнаўца і краязнаўца Валеры Дранчук уручае навуковаму супрацоўніку Нясвіжскага гісторыка-краязнаўчага музея Ірыне Калібабе кнігу “Краявіды. Жывапіс”, прысвечаную творчасці мастака Івана Дмухайлы, якую ён у свой час падрыхтаваў да друку

Як мы ўжо паведамлялі, у канцы лютага ў Нясвіжы прайшло святкаванне 110-гадовага юбілею нашага знакамітага земляка, мастака Міхаіла Канстанцінавіча Сеўрука.

М.К. Сеўрук, прадстаўнік заходнебеларускага накірунку мастацтва, ураджэнец і жыхар Нясвіжа, быў выхаванцам мастацкага факультэта Віленскага ўніверсітэта, вучнем Фердынанда Рушчыца і Людаміра Сляндынскага. Ён стаў прадстаўніком творчай школы віленскага класіцызму першай паловы ХХ стагоддзя і разам з тым — легендай нашай нацыянальнай культуры. Мастак бліскуча валодаў алоўкам, быў тонкім каларыстам, ведаў усе тэхнікі эстампа, а ў яго цудоўнай графіцы, жывапісе, пейзажнай акварэлі, ксіла-графіі і лінагравюры адчуваецца ўнікальная літоўская школа, якая не падобна на іншыя. Яго творы да гэтага часу не страцілі сваю мастацкую каштоўнасць і заўсёды добра ўспрымаюцца гледачамі.

Юбілейныя мерапрыемствы да дня нараджэння Міхаіла Сеўрука пачаліся з мітынгу, прысвечанага адкрыццю памятнага барэльефа на яго магіле. На мітынгу прысутнічалі намеснік начальніка аддзела ідэалагічнай работы, культуры і па справах моладзі Міхаіл Мацэль, лаўрэат дзяржаўнай прэміі БССР, народны мастак Беларусі, вучань М.К. Сеўрука Леў Гумілеўскі, скульптар Сяргей Гумілеўскі, член Саюза мастакоў Беларусі Ігар Бархаткоў, сябры сям’і Сеўрукаў Яўгенія Халецкая і Валерый Палікарпаў, прыхільнікі таленту знакамітага майстра, нашы няс-віжскія мастакі Марына і Міхаіл Канавалавы і іншыя зацікаўленыя асобы. З прамовамі пра Міхаіла Сеўрука выступілі намеснік начальніка аддзела ідэалагічнай работы, культуры і па справах моладзі Міхаіл Мацэль і народны мастак Беларусі Леў Гумілеўскі, сябра сям’і Сеўрукаў Валерый Палікарпаў.

Сябра М.К. Сеўрука Валерый Палікарпаў падарыў музею  неапублікаваныя копіі рукапісных успамінаў мастака аб навучанні на мастацкім факультэце  Віленскага ўніверсітэта

Сябра М.К. Сеўрука Валерый Палікарпаў падарыў музею неапублікаваныя копіі рукапісных успамінаў мастака аб навучанні на мастацкім факультэце Віленскага ўніверсітэта

Памятны барэльеф М.К. Сеўруку быў адкрыты яго аўтарамі — Львом і Сяргеем Гумілеўскімі.

Арганізатары мітынгу таксама выказалі словы ўдзячнасці менеджару ТАА “ДэГран” Віталю Лапаніку за паважлівае стаўленне да памяці мастака і вялікую дапамогу, аказаную ва ўстаноўцы барэльефа.

Затым юбілейныя мерапрыемствы прадоўжыліся ў цэнтральнай раённай бібліятэцы, дзе штогод да дня нара-джэння мастака праходзяць выстаўкі з фондаў Нясвіжскага гісторыка-краязнаўчага музея, прысвечаныя яго творчасці. На гэты раз супрацоўнікі музея падрыхтавалі сюрпрыз і прадставілі гледачам работы, якія яшчэ амаль ніхто не бачыў, таму што яны знаходзіліся ў запасніках музея і патрабавалі афармлення. І вось дзякуючы дапамозе мастака Міхаіла Канавалава аматары творчасці М.К. Сеўрука змаглі ўбачыць іх у новых рамах. Акрамя выстаўкі з фондаў музея, да юбілею мастака супрацоўнікі цэнтральнай раённай бібліятэкі падрыхтавалі выставу друкаваных выданняў пра М.К. Сеўрука.

Як заўважыла ў сваім звароце да прысутных галоўны бібліёграф аддзела абслугоўвання і нфармацыі  Алёна Чухлей, краязнаўчая дзейнасць з’яўляецца адным з галоўных накірункаў работы цэнтральнай раённай бібліятэкі. Вялікая ўвага надаецца і юбілейным датам нашых славутых землякоў, да якіх рыхтуюцца буклеты “Нашы землякі-юбіляры”. Адзін з іх — “Мастак жыве ў сваіх палотнах” — расказвае аб жыцці і дзейнасці М.К. Сеўрука.

Вучаніца М.К. Сеўрука Юзэфа Мечыславаўна Цвірка дзеліцца  ўспамінамі пра яго з сяброўкай сям’і Сеўрукаў  Яўгеніяй Іванаўнай Халецкай

Вучаніца М.К. Сеўрука Юзэфа Мечыславаўна Цвірка дзеліцца ўспамінамі пра яго з сяброўкай сям’і Сеўрукаў Яўгеніяй Іванаўнай Халецкай

На працягу апошніх шасці гадоў ў цэнтральнай раённай бібліятэцы таксама праходзіць адкрыццё пленэру юных мастакоў імя М.К. Сеўрука, ініцыятарам і адным з арганізатараў якога з’яўляецца Марына Канавалава — мастак, кіраўнік мастацкай студыі Нясвіжскай дзіцячай школы мастацтваў, выкладчык Нясвіжскага каледжа імя Якуба Коласа, прыхільніца творчасці М.К. Сеўрука. Марына Пятроўна расказала прысутным аб ідэі стварэння штогадовага пленэру, які дапамагае юнаму пакаленню пранікацца духам творчасці мастака і лепш разумець яе, аб асаблівасцях яго праходжання.

Пасля цэнтральнай раённай бібліятэкі юбілейныя мерапрыемствы перамясціліся ў кватэру-музей М.К. Сеўрука. Там прадоўжылася зацікаўленая размова аб творчасці мастака. Адзін з яе ўдзельнікаў, журналіст і мастацтвазнаўца Валеры Дранчук расказаў аб стварэнні календара “Графіка травы і лістоў”, у якім былі адлюстраваны ўзоры алоўкавай спадчыны майстра. Ён быў выда-дзены па ініцыятыве і пры дапамозе Валерыя Аркадзьевіча ў 2003-м годзе.

Юныя мастачкі, выхаванкі Нясвіжскай дзіцячай школы мастацтваў  Вольга Барсукевіч і Кацярына Плакса, навучэнкі аддзялення дызайну Нясвіжскага каледжа імя Якуба Коласа Дарына Мітракова і Аксана Сланімская стваралі  свабодныя копіі карціны М.К. Сеўрука “Настурцыі”

Юныя мастачкі, выхаванкі Нясвіжскай дзіцячай школы мастацтваў Вольга Барсукевіч і Кацярына Плакса, навучэнкі аддзялення дызайну Нясвіжскага каледжа імя Якуба Коласа Дарына Мітракова і Аксана Сланімская стваралі свабодныя копіі карціны М.К. Сеўрука “Настурцыі”

“Адным росчыркам пяра ці алоўка ён мог стварыць вобраз”, — так ахарактарызаваў майстэрства М.К. Сеўрука Валеры Дранчук.

Шмат цікавага ўдзельнікі мерапрыемства даведаліся і з аповеду члена Саюза мастакоў Беларусі, калекцыянера Ігара Бархаткова. У прыватнасці, ён звярнуў увагу прысутных на тое, што далёка не ўсе ведаюць пра слаба вывучаную яшчэ даваенную манументальную спадчыну М.К. Сеўрука — роспіс касцёлаў у Польшчы.

— У нас дзясяткі выдатных мастакоў, — зазначыў Ігар Антонавіч, — але Сеўрук займае сярод іх адно з самых лепшых месцаў —  настолькі тонкае яго  мастацтва, настолькі тонкі жывапіс. Яго работы быццам і сціплыя, але такой жывапіснай тонкасці няма ні ў аднаго мастака Беларусі, таму што абсалютная большасць беларускіх мастакоў вучылася ў Маскве ці Пецярбургу, а Сеўрук адрозніваецца тым, што ў яго школа віленская. Яна іншая — не лепшая і не горшая, яна проста іншая. І я віншую нясвіжскі музей з тым, што ён змог так захаваць яго спадчыну.

Падчас мітынгу, прысвечанага адкрыццю памятнага барэльефа на магіле М.К. Сеўрука

Падчас мітынгу, прысвечанага адкрыццю памятнага барэльефа на магіле М.К. Сеўрука

У тым, што гэта спадчына не толькі старанна захоўваецца, але і становіцца набыткам маладога пакалення, удзельнікі сустрэчы змаглі пераканацца падчас знаёмства з работамі юных дараванняў, выхаванак мастака і педагога Марыны Канавалавай. За некалькі гадзін у адным з пакояў кватэры-музея яны стварылі копіі карціны М.К. Сеўрука “Настурцыі”. Копіямі ў прамым сэнсе назваць іх работы было б не зусім правільна, таму што кожная з юных мастачак уклала ў іх сваё бачанне тэмы, сваё ўспрыманне, зрабіўшы свой твор падобным на арыгінал і ў той жа час непаўторным. Госці кватэры-музея, сярод якіх было шмат прафесійных мастакоў, высока ацанілі работы дзяўчат і пажадалі ім не спыняцца на дасягнутым і з тым жа творчым імпэтам і далей вывучаць выяўленчае мастацтва і шукаць сваё месца ў ім. Яны таксама пакінулі на памяць юным мастачкам аўтографы на іх работах.

Завяршыліся памятныя мерапрыемствы падрабязным аналізам свабодных копій карціны М.К. Сеўрука “Настурцыі”, які правёў член Саюза мастакоў Беларусі Ігар Бархаткоў.

Соф’я ЛЮБАНЕЦ.

Фота Святланы ПОЛЬСКАЙ.


Поделитесь с друзьями
  •  
  • 1
  •  
  •  
  •  
  •  

У памяць пра мастака: 2 комментария

  • 21.03.2015 в 23:08
    Permalink

    Правільна было б пісаць не Сеўрук, а Сяўрук. Як і падае прозвішча выбітнага мастака беларуская Вікіпедыя. Трэба трымацца беларускага, ідэнтычнага варыянта. Дзякуй за публікацыю!

    Рейтинг комментария:Vote +10Vote -10

  • 21.03.2015 в 23:03
    Permalink

    Нясвіж варты мастака, якім быў Міхал Сяўрук. Можна толькі вітаць глыбокую шчырую памяць пра майстра. Годныя госці, змястоўная святочная праграма, багатая публікацыя. І слова аўтара, і фотаздымкі заслугоўваюць чытацкай аудыторыі і падзякі.

    Рейтинг комментария:Vote +10Vote -10

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.