Бібліятэчныя сюрпрызы

Поделитесь с друзьями
  •  
  •  
  •  
  •  
  •  
  •  

Грамату “Лідар чытання-2016” атрымалі вучаніцы  СШ №3 г. Нясвіжа Паліна Пратасава і Валерыя Цяляпіна

Грамату “Лідар чытання-2016” атрымалі вучаніцы СШ №3 г. Нясвіжа Паліна Пратасава і Валерыя Цяляпіна

У мінулы чацвер па ўсёй нашай краіне адзначаўся дзень бібліятэк, да якога, па традыцыі, прымяркоўваюцца шматлікія мерапрыемствы і акцыі, накіраваныя на папулярызацыю чытання. Самы актыўны ўдзел у іх прымае і наша цэнтральная раённая бібліятэка імя Паўлюка Пранузы, якая і на гэты раз падрыхтавала для сваіх наведвальнікаў цікавыя сюрпрызы.

Самым значным і арыгінальным з іх была літаратурна-музычная праграма “Мужчына і жанчына. Рэпетыцыя”, што адбылася ў рамках раённай акцыі “Бібліяноч-2016”. Падчас гэтай тэатралізаванай імпрэзы наведвальнікі бібліятэкі змаглі ўвачавідкі пазнаёміцца з Тамарай Лісіцкай і Ігарам Паляковым, таленавітымі творчымі людзьмі, кожны з якіх варты асобнага аповеду.

Вось такая яна — Тамара Лісіцкая. Увесь час розная, але заўсёды абаяльная і непараўнальная

Вось такая яна — Тамара Лісіцкая. Увесь час розная, але заўсёды абаяльная і непараўнальная

Імя Тамары Лісіцкай на слыху ў кожнага, хто хоць больш-менш знаёмы з беларускай медыйнай прасторай. Яшчэ ў 10 гадоў яна як салістка школьнага трыа перамагла ў тэлеконкурсе “Чырвоныя гваздзікі”, пасля чаго была запрошана весці дзіцячыя перадачы на БТ. У 14 гадоў першы раз выйшла ў прамы эфір на тэлебачанні. Тады ж пачала весці перадачы на радыё, стаўшы ў 19 гадоў першай вядучай беларускага fm-эфіра на першай беларускай радыёстанцыі «BA international».

Падчас вучобы на факультэце журналістыкі БДУ вяла папулярную тэлепраграму «Foxy Music» (8 канал). Затым была аўтарам, вядучай і рэжысёрам штотыднёвага тэлечасопіса “12, або на Ноч гледзячы” на БТ.

У 1996 — 1998 гадах працавала ў тэлекампаніі «ВИД» выпускаючым рэжысёрам праграмы «Час пік». З тэлебачаннем была звязана і дыпломная работа Тамары Лісіцкай “Імідж і асоба тэлевядучага”, якую яна абараніла пры заканчэнні БДУ ў 2000 годзе. У той жа год яна пачала працаваць на радыёстанцыі «Альфа-радыё», а праз два гады ізноў на БТ, дзе вяла прамыя эфіры «Еўрабачанне-2004», «Славянскі базар», праграмы «Дзённік жанчыны», «Дарэчы», «Вось такія пірагі», ток-шоу «Толькі жанчына ведае”.

Выстава-продаж кніг Тамары Лісіцкай і Ігара Палякова

Выстава-продаж кніг Тамары Лісіцкай і Ігара Палякова

У яе “паслужным” спісе таксама работа вядучай і праграмным дырэктарам інтэрнэт-радыё-станцыі “NETradio” з 2007 года і вядучай прамога эфіру і аўтарскіх праектаў на радыёстанцыі “Радиус fm” з 2011-га.

Адданасць гераіні гэтага аповеду тэле- і радыёэфіру, яе талент і харызма не засталіся незаўважанымі: у 2006 годзе яна стала лаўрэатам прэміі “50 самых прыгожых і паспяховых”, у наступным — прэміі “PR-персона 2007”, у 2009 — прафесійнай радыё-прэміі імя Папова, у 2011 — прэміі “PR-персона 2011”.

У студзені 2012 года на 11-й цырымоніі ўзнагароджвання пераможцаў прафесійнага конкурсу «Брэнд года-2011», якая праходзіла ў Нацыянальнай бібліятэцы, Тамара Лісіцкая была ўдастоена залатога медаля, а ў сакавіку 2013-га па выніках галасавання ў рамках сумеснага праекта “Сакрэт поспеху”, што праводзіцца фондам ААН у вобласці народанасялення і парталам Lady.tut.by, стала чацвёртай сярод ТОП-10 самых паспяховых жанчын Беларусі. 

Некалькі апошніх гадоў яна займаецца дабрачыннымі акцыямі для хворых дзяцей і дзяцей-сірот.

З цягам часу багаты ўнутраны свет журналісткі, звычка назіраць, аналізаваць і знаходзіць прычыны падзей і ўчынкаў лю-дзей адлюстраваліся ў літаратурнай творчасці. З-пад яе пяра выйшлі кнігі прозы “Ідыёткі”, “Ціхі цэнтр”, “Пацалунак бусла”, зборнік лірыкі “Багіня, або Плач хатняй гаспадыні”, асобныя вершы ўвайшлі ў зборнік паэзіі сучасных беларускіх аўтараў “Кавалер і дамы”. Тамара Лісіцкая таксама з’яўляецца аўтарам сцэнарыяў да тэлефільма “Усё змяшалася ў доме”, тэлесерыялаў “Барвіха”, “Ціхі цэнтр”, “Гадзіны кахання”, “Мужчына ўва мне”, “Я адмяняю смерць”, “Ангел або дэман”, “Жыццё толькі пачынаецца”. Як актрыса яна здымалася ў фільме “Нядзеля ў жаночай лазні” і тэлесерыяле “Ціхі цэнтр”.  

На сустрэчы з чытачамі Нясвіжскай цэнтральнай раённай бібліятэкі Тамара Лісіцкая прадставіла лірычны зборнік “Багіня, або Плач хатняй гаспадыні” і кнігу “Пацалунак бусла”, прысвечаную тэме мацярынства, аб якой ведае не па чутках, маючы траіх дзяцей ад 17 да 8 гадоў.  

Выступае Ігар Палякоў

Выступае Ігар Палякоў

Вельмі цікавым было і знаёмства з Ігарам Паляковым — пісьменнікам, рэжысёрам, відэамейкерам.      Ён нарадзіўся і вырас у Гомелі, там жа скончыў школу і ў самым канцы 80-х паступіў на матэматычны факультэт Гомельскага ўніверсітэта.

З сярэдзіны 2000-х працаваў у сферы відэавытворчасці, а восенню 2009-га  дэбютаваў у якасці рэжысёра, зняўшы невялікі кароткаметражны фільм “Танга Кастрычнік…”, які перамог у тым жа годзе ў адной з намінацый беларускага альтэрнатыўнага кінафоруму “КінаВарка-2009”.

У 2012 г. выпусціў першы поўнаметражны фільм “Сакрэт майго Повара”. З невялікай задумкі карціна за паўтара года ператварылася ў вялікі і па-свойму ўнікальны праект, які быў зняты на мінімум сродкаў, але пры дапамозе вельмі таленавітых і надзвычай добрых людзей з сямі краін свету. 30 лістапада 2012 года, якраз напярэдадні фіналу першага сезона літаратурнага конкурсу «Першая глава», адбыліся прэм’ера і прэзентацыя фільма ў кінатэатры «Піянер».

Ігар Палякоў перамог у гэтым конкурсе з аповесцю “Прасторы”, якую пачаў пісаць яшчэ ў 2001 г. Кніга неаднойчы перапісвалася і дапрацоўвалася.

— Розныя перыяды жыцця, вопыт, перажыванні дапамаглі пакінуць у ёй тое, што ў выніку і атрымалася, — так гаворыць пра кнігу сам аўтар. —  Вельмі хацелася не проста напісаць гісторыю, а стварыць на паперы жыццё са сваімі жывымі дэталямі, людзьмі, якія адчувалі б радасць і боль, размаўлялі, думалі, шукалі. Адным словам — жылі.

Менавіта гэта кніга і была прэзентавана нясвіжскім чытачам самім аўтарам, чалавекам, які перамог у барацьбе з цяжкай хваробай і на ўласным вопыце зведаў, якую высокую цану мае жыццё і магчымасць бачыць, чуць, гаварыць і рухацца — самому, на сваіх нагах. І хаця пры хадзьбе Ігар абапіраўся на мыліцу, наўрад ці ў каго з”явілася жаданне  пашкадаваць яго — настолькі моцная ўпэўненасць і спакой зыходзілі ад яго асобы, што, думаецца, для многіх ён стаў натхняльным прыкладам перамогі над уласнай слабасцю і страхам, веры над нявер’ем.

Падарунак ад аўтара атрымаў самы юны, але вельмі ўважлівы ўдзельнік сустрэчы Ігнат Запольскі

Падарунак ад аўтара атрымаў самы юны, але вельмі ўважлівы ўдзельнік сустрэчы Ігнат Запольскі

Калі дадаць сюды яшчэ вельмі артыстычнае чытанне ўрыўкаў з уласнай кнігі і вершаў калегі па выступленні Тамары Лісіцкай, то стане зразумелым, што ўсе прысутныя атрымалі незабыўныя ўражанні і напрыканцы літаратурна-музычнай імпрэзы задалі гасцям шмат пытанняў, звязаных як з іх творчасцю, так і з асабістым жыццём. У правядзенні мерапрыемства вялікую дапамогу аўтарам аказаў начальнік аддзела маркетынгу групы кампаній “Рэгістр” Вячаслаў Ляскоўскі. Дарэчы, тыя, хто не прысутнічаў на сустрэчы і не набыў кнігі Тамары Лісіцкай і Ігара Палякова з аўтографамі аўтараў, могуць узяць іх пачытаць у раённай бібліятэцы, дзе заўсёды рады наведвальнікам.

Сярод лепшых чытачоў бібліятэкі, якія былі названы напачатку “Бібліяночы-2016” — несвіжанка Таццяна Васільеўна Маскалік

Сярод лепшых чытачоў бібліятэкі, якія былі названы напачатку “Бібліяночы-2016” — несвіжанка Таццяна Васільеўна Маскалік

Знаёмствам з гэтымі цікавымі людзьмі праграма “Ночы ў стылі LIBRARY” у цэнтральнай раённай бібліятэцы не абмежавалася. Усіх жадаючых тут чакала шмат іншых незвычайных спраў. Так, падчас латарэі-сюрпрыза “Кніжны дождж” новы чытач выцягваў нумарок, па якім атрымліваў пэўную кніжку і невялікі падарунак. За вечар, дарэчы, у бібліятэку запісаліся 47 чалавек. У бібліякафэ “Смачная кніга” прапаноўвалася кава і салодкія пачастункі за спецыяльную валюту — “біблікі”, для атрымання якіх трэба было прыняць удзел у рабоце гульнявых пляцовак.   

Латарэю-сюрпрыз “Кніжны дождж” вядзе загадчык аддзела камплектавання і апрацоўкі літаратуры Кацярына Дубовік (на ніжнім здымку).  На верхнім здымку: за ўдзел у латарэі — вясёлы смайлік

Латарэю-сюрпрыз “Кніжны дождж” вядзе загадчык аддзела камплектавання і апрацоўкі літаратуры Кацярына Дубовік (на ніжнім здымку). На верхнім здымку: за ўдзел у латарэі — вясёлы смайлік

8

У бібліякафэ “Смачная кніга” з задавальненнем заходзілі ўладальнікі “бібліятэчнай валюты” — “біблікаў”

У бібліякафэ “Смачная кніга” з задавальненнем заходзілі ўладальнікі “бібліятэчнай валюты” — “біблікаў”

Сумесна з работнікамі гарадскога маладзёжнага цэнтра было падрыхтавана ток-шоу “Інтэлект +”, у якім удзельнічалі каманды Нясвіжскага дзяржаўнага каледжа імя Якуба Коласа, Нясвіжскай гімназіі і СШ №1 г. Нясвіжа.

На другім паверсе бібліятэкі можна было таксама патрапіць на “востраў творчасці”, дзе ўсіх жадаючых чакала выстава творчасці майстра па фаамірану, палімернай гліне і фларыстычным матэрыяле Наталлі Рыбалка з правядзеннем майстар-класа па фааміране, фотасэлфі “Устаў твар”, казачны аквагрым, займальныя галаваломкі, пляцоўка “Playstation” і іншыя цікавыя заняткі, якія можна ўбачыць у нашым фотарэпартажы.

Майстар-клас работы з фааміранам дае Наталля Рыбалка

Майстар-клас работы з фааміранам дае Наталля Рыбалка

Юныя наведвальнікі бібліятэкі за рашэннем займальных галаваломак

Юныя наведвальнікі бібліятэкі за рашэннем займальных галаваломак

“Партрэт у падарунак” можна было атрымаць ад навучэнак Нясвіжскага каледжа імя Якуба Коласа Надзеі Дземідовіч (на фота) і Ванэсы Карпавай

“Партрэт у падарунак” можна было атрымаць ад навучэнак Нясвіжскага каледжа імя Якуба Коласа Надзеі Дземідовіч (на фота) і Ванэсы Карпавай

Казачны аквагрым з натхненнем стварала ўсім жадаючым навучэнка Нясвіжскага каледжа імя Якуба Коласа Вераніка Міхнавец

Казачны аквагрым з натхненнем стварала ўсім жадаючым навучэнка Нясвіжскага каледжа імя Якуба Коласа Вераніка Міхнавец

Касметалагічны майстар-клас ад кампаніі “Мэры Кэй”

Касметалагічны майстар-клас ад кампаніі “Мэры Кэй”

Падчас правядзення ток-шоу “Інтэлект +”

Падчас правядзення ток-шоу “Інтэлект +”

Падчас спаборніцтваў па лазертагу

Падчас спаборніцтваў па лазертагу

Соф’я ЛЮБАНЕЦ

Фота Іны ВАСІЛЕВІЧ


Поделитесь с друзьями
  •  
  •  
  •  
  •  
  •  
  •  

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.