Па запрашэнні Савета Рэспублікі Нацыянальнага сходу Рэспублікі Беларусь парламенцкая дэлегацыя Пакістана на чале са Старшынёй Сената Парламента Ісламскай Рэспублікі Пакістан Міан Разы Рабані наведала Рэспубліку Беларусь 1 — 4 лютага 2017 г. У рамках візіту адбыліся сустрэча спікера Пакістанскага Парламента з Прэзідэнтам Беларусі Аляксандрам Лукашэнкам. Прайшлі перамовы са Старшынёй Савета Рэспублікі М.В. Мясніковічам, Старшынёй Палаты прадстаўнікоў У.П. Андрэйчанкам, Прэм’ер-міністрам Рэспублікі Беларусь А.У. Кабяковым.
Падводзячы вынікі візіту пакістанскі госць адзначыў, што адразу па прыездзе ў Мінск дэлегацыя адчула цяпло і гасціннасць з боку беларускага народа. Ён таксама выказаў меркаванне, што Беларусь дасягнула высокіх вынікаў у многіх сферах развіцця. Міан Разы Рабані сказаў, што Беларусь і Пакістан за досыць кароткі час змаглі стварыць дагаворна-прававую базу для супрацоўніцтва, якая ўключае больш за 70 пагадненняў і дамоваў у розных сферах, у тым ліку ў эканоміцы. Старшыня Сената ўпэўнены, што ўзаемаадносіны і супрацоўніцтва паміж Беларуссю і Пакістанам у далейшым будуць развівацца і мацнець.
Акрамя перамоў, Міану Разы Рабані была прапанавана шырокая праграма знаёмства з Сінявокай. За некалькі дзён пакістанская дэлегацыя пабывала ў горадзе Жодзіна, сустрэлася з прафесарска-выкладчыцкім саставам і студэнтамі Беларускага дзяржаўнага ўніверсітэта, наведала ААТ “МАЗ”, “БелАЗ”. Госці пабывалі ў Беларускім дзяржаўным музеі гісторыі Вя-лікай Айчыннай вайны, Нацыянальным мастацкім музеі. Завяршальным акордам візіту пакістанскіх гасцей стала знаёмства з гісторыка-культурнай спадчынай Нясвіжа.
“НН”.