22 жніўня ў дзяржаўным прадпрыемстве “Эксперыментальная база “Свеклавічная” пасеялі азімы рапс на ўсёй 150-гектарнай плошчы. Для гэтага механізатару Пятру Губею, які працуе на трактары “Джон Дзір 8430”, спатрэбілася 4 дні.
Размясцілі азімы рапс пасля азімага трыцікале. Унеслі ў глебу фосфарныя і калійныя ўгнаенні. Узараў поле механізатар Уладзімір Панкрат на МТЗ-3022. А перадпасяўную апрацоўку на МТЗ-1221 з АКШ-6,0 правёў Яўген Катлубай. Для сяўбы выкарыстоўвалі гібрыды “брэнтана” фірмы “Байер” і “мерсэдэс” фірмы “Рапуль”.
Сёлета азімы рапс даў у сельгаспрадпрыемстве па 51,9 цэнтнера алейнага насення з гектара — гэта другі паказчык у раёне пасля СВК “Агракамбінат Сноў”. Пад ураджай 2018 года плошчу пад гэтай культурай павялічылі на 40 гектараў.
— На палях зараз вядзём шматлікія іншыя работы, — расказвае галоўны аграном эксперыментальнай базы Яўген Саліта. — Працягваецца ўборка саломы. На яе прэсаванні заняты механізатары Павел Крэнь і Георгій Новік. Пад азімыя ўносяць мінеральныя ўгнаенні Аляксей Сягай і Іван Пічкоўскі. Вядзецца ворыва глебы. У гэту работу яшчэ ўключыўся Рыгор Ярмохін на МТЗ-3022. Уносім гліфасаты. Ідзе вывазка арганікі пад азімыя трыцікале і пшаніцу. Яны зоймуць адпаведна 300 і 450 гектараў.
На збожжавым складзе ў пасёлку Ударным працуе спецыяльная лінія па падрыхтоўцы насення. Для сяўбы на сваіх палях яго сёлета патрэбна 150 тон. А як насенняводчая гаспадарка, “Свеклавічная” плануе яшчэ 300 тон рэалізаваць.
На збожжавы азімы клін механізатар Пётр Губей выведзе пасяўны агрэгат у першай дэкадзе верасня.
Як паведамілі “НН” у дыспетчарскай райсельгасхарчу, па стане на раніцу 24 жніўня сяўбу азімага рапсу завяршылі таксама ААТ “Нясвіж-скія Астроўкі”, СВК “Агракамбінат Сноў”, ААТ “Нясвіжскі райаграсэрвіс”. Яго пасеяна па раёне 1265 га (80,1 %).
Тамара ПРАЛЬ-ГУЛЬ.