У Нясвіжскім доследна-вытворчым лясніцтве працуюць 25 чалавек, у т.л. 10 вальшчыкаў лесу, 2 трактарысты. Работы хапае. Так, у бягучым годзе пасаджана 18,1 гектара лясных культур, з іх дуб заняў 5,4 га (раскінуўся малады гай у раёне вёскі Вялікая Ліпа).
На плошчы 56 га праведзены рубкі догляду маладняку. На 130 гектарах — рубкі прамежкавага карыстання, дзе нарыхтавана больш за 2,5 тысячы кубаметраў драўніны. Аднак з ліпеня гэты від лесагаспадарчай дзейнасці спынены ў сувязі з неабходнасцю весці суцэльныя санітарныя рубкі. Прычынай стала ўсыханне хвойных лясоў, павелічэнне такіх плошчаў. Так, суцэльныя санітарныя рубкі былі праведзены больш чым на 20 гектарах, нарыхтавана каля 5 тысяч кубаметраў драўніны. Выбарачныя санітарныя рубкі зроблены больш чым на 30 гектарах, нарыхтавана больш за тысячу кубаметраў драўніны.
Вялікая работа праведзена і праводзіцца па ўтрыманні дэндрапарку. Рабочыя лясніцтва паднавілі ранейшую сетку сцяжынак, стварылі новыя. Скошваюць травяністую расліннасць, добра-ўпарадкуюць тэрыторыю.
— Многае робім па ахове лесу, папярэджанні пажараў, — расказвае ляснічы Віктар Бабко. — Усе мерапрыемствы на пажаранебяспечны перыяд былі распрацаваны з гаспадаркамі, тэхніка знаходзілася ў поўнай гатоўнасці. У гэтым годзе лясных пажараў не было.
Летась работнікі Нясвіжскага лясніцтва шмат папрацавалі разам са сваімі калегамі ў Смалявіцкім раёне на ліквідацыі наступстваў урагану, на ачышчэнні бураломаў і пасадцы маладога лесу. За актыўны ўдзел у гэтай акцыі ляснічы Нясвіжскага ляс-ніцтва Віктар Бабко адзначаны нядаўна Граматай Мінскага дзяржаўнага вытворчага лесагаспадарчага аб’яднання.
Напярэдадні свайго прафе-сійнага свята нашы землякі таксама атрымалі ўзнагароды. Ляснік Іван Ёдзік удастоены Ганаровай граматы Міністэрства лясной гаспадаркі Рэспублікі Беларусь. Віктару Бабко прысвоена званне “Ляснічы 2 класа”. Ляснік Аляксандр Капытка і трактарыст Уладзімір Калевіч адзначаны Ганаровымі граматамі дзяржаўнай лесагаспадарчай установы “Клецкі лясгас”.
Тамара ПРАЛЬ-ГУЛЬ.
Здымкі прадастаўлены Нясвіжскім лясніцтвам.