Людміла Іванаўна ВІТКО, дырэктар Нясвіжскай цэнтральнай раённай бібліятэкі імя Паўлюка Пранузы:
— У гэты дзень я вяла ўрачыстую цырымонію ўзнагароджвання працаўнікоў Міншчыны — яна праходзіла ў абласным выканаўчым камітэце. І мой сувядучы Яўген Асташоў заўважыў: “Калі ты зачытваеш прозвішчы нясвіжскіх людзей, ты іх неяк асабліва выдзяляеш”. Сапраўды, я і сама адзначала такое. Таму што перапаўняе гонар за свой раён.
У Палацы Рэспублікі быў паказаны відэаролік пра Мінскую вобласць, названы флагманы рэгіёна — Мінскі, Дзяржынскі і Нясвіжскі раёны. Слухала — і было вельмі радасна за Нясвіжчыну, дзе жыву і працую, за яе лю-дзей, іх здабыткі, за свой, няхай невялікі, уклад у агульныя поспехі.
Нават на лагатыпе святочнага мерапрыемства была “часцінка” Нясвіжчыны: разам з выявамі Кургана Славы і БелАЗа на ім змясцілі выяву нашага замка.
Таму гонар за Міншчыну, пачуццё патрыятызму — так, гэта ёсць у маёй душы.
Тамара ПРАЛЬ-ГУЛЬ.
Фота Наталлі ЕРМАШЭНКА.