Нядаўна нашы землякі прынялі ўдзел у 12 абласным фестывалі нацыянальных культур, які праходзіў ў Маладзечне. Другі год удзельнічаюць у фестывалі майстры дэкаратыўна-прыкладнога мастацтва з Нясвіжскага раённага цэнтра народнай творчасці. У мінулым годзе калектыў атрымаў дыплом “За адраджэнне народных рамёстваў”. Сёлета несвіжанка-украінка Вера Іванаўна Мацнева паказала на выставе свае вырабы з саломкі і фамерану. З традыцыямі польскага народа знаёмілі гасцей свята нашы зямлячкі Ядзвіга Анатольеўна Туркова, якая стварае цудоўныя ўпрыгожванні ў тэхніцы фрывалітэ, Наталля Сцяпанаўна Богуш (вышыўка бісерам), Алена Мар’янаўна Івахніна (інкрустацыя саломкай і вырабы з фамерану). Наталія Мікалаеўна Леўшына (на здымку) паказала не толькі вышываныя ручнікі, але і пачаставала гасцей свята смачнымі стравамі польскай кухні. Усе нясвіжскія ўмеліцы атрымалі дыпломы і каштоўныя падарункі.
Пасля выставы адбыўся канцэрт з удзелам прадстаўнікоў розных нацыянальнасцей. Цёпла прымалі гледачы выступленне пастаянных удзельнікаў фестывалю — сямейнага дуэта Ганны Язэпчык і Таццяны Саарбекян (Язэпчык) з Новагарадзейскага СЦКіА з песняй на армянскай мове “Першая любоў”, трыа ў складзе Ганны Кулагі, Хрысціны Пятрэнка і Вольгі Процыкавай з украінскай народнай песняй “Сіла Птаха”, для якіх удзел у фестывалі адбыўся ўпершыню. Ганна Язэпчык і Таццяна Саарбекян шмат разоў станавіліся ўдзельнікамі міжнароднага фестывалю нацыянальных культур у Гродне.
Слухаючы выступленні несвіжан, гледзячы, як зала замірала пад гукі ўкраінскай песні і гучна апладзіравала нясвіжскаму армянскаму дуэту — людзям, адарваным ад сваёй зямлі, ад сваіх каранёў, сваёй культуры, якія і на чужыне пра сваё не забыліся, памятаюць мову, свае песні, я вельмі радавалася і за свой народ. Яго сціпласць, міралюбівасць, талерантнасць, што дае магчымасць шчасліва жыць на беларускай зямлі прадстаўнікам розных народаў. І хоць сумуюць яны калі-нікалі па сваёй радзіме, але гасцінная Беларусь суцяшае і прымае іх шчыра ў свае абдымкі.
Да выступлення нашых землякоў былі неабыякавыя не толькі госці свята, але і прафесійнае журы. Трыа несвіжан з украінскай народнай песняй “Сіла Птаха” запрасілі на міжнародны фестываль нацыянальных культур у Гродна.
Валянціна ШЧАРБАКОВА,
г. Нясвіж.