Вітаем вас, родныя землякі! — з гэтых слоў у чарговы раз пачалося мерапрыемства ў Слаўкаўскім сельскім клубе. Не паспелі вяскоўцы забыцца на летняе свята вёскі, якое аб’яднала тых, хто нарадзіўся, вырас або працуе на Слаўкаўскай зямлі, як зімовы вечар сабраў усіх жадаючых з чарговай нагоды. На гэты раз работнікі культуры вырашылі ўшанаваць тых, чые рукі, не ведаючы стомы, ствараюць дзівосы з прыродных і самых звычайных спадручных матэрыялаў, кулінарныя шэдэўры, без якіх не адбываецца ні адно свята чалавека, увасабляючы свае фантазіі і мроі ў рэаліі. Нездарма кажуць, што работы, зробленыя сваімі рукамі, грэюць па-асабліваму, выпраменьваюць дабрыню, закрываюць крылом анёла, спрыяюць дабрабыту гаспадароў.
Менавіта таму з выставай народных умельцаў пад назвай “Захапленні на ўсе пакаленні” вяскоўцы і госці свята маглі пазнаёміцца практычна на ўваходзе і, атрымаўшы ў падарунак часцінку душы майстра, заняць сваё месца ў глядзельнай зале.
Вядома, у цэнтр на пачэсныя месцы былі запрошаны паважаныя ўмельцы — Алена Анатольеўна Хоміч, Лілія Барысаўна Акіф’ева, Марыя Уладзімі-раўна Шчарбіцкая, Наталля Аркадзьеўна Супрун, Любоў Максімаўна Белахвостава. Пра гэтых жанчын, якія валодаюць асаблівай беларускай прыгажосцю, мы даведаліся многа жыццёвых падрабязнасцей. Аповед ішоў пра іх юнацтва і сённяшні дзень, пра тое, якія яны добрыя гаспадыні і клапатлівыя жонкі, матулі, бабулі, а некаторыя і прабабулі. Расказвалі яны, адкуль прыйшло захапленне цудоўнай справай — тварыць. Хочацца верыць, што многія з прысутных іх ідэі возьмуць на заметку, а, магчыма, і самі зазірнуць у свет прыгажосці. Бо, як вядома, гэтага трэба проста захацець.
Упэўнена, з асаблівым гонарам за даручаную справу на мерапрыемстве ў ролі вядучай выступіла Галіна Русак.
“Дзень добры, палеткі і хаты!
Дзень добры, рамёстваў свята!” — мілагучна лілася з вуснаў родная мова, вялася шчырая размова пра таленавітых людзей, што славяцца не толькі ў запаветным куточку Беларусі — маленькай вёсцы Слаўкава і яе акрузе, але і за межамі краіны. Бо пра талент нашых майстроў ведаюць далёка, з задавальненнем набываюць іх работы для падарункаў родным і сувеніраў для гасцей, упрыгожвання жылля, пачастункаў на вяселлі і дні нараджэння.
Таму і артысты, як дарослыя, так і маленькія, у гэты дзень стараліся па-асабліваму. Музычныя падарункі загадзя абмяркоўваліся, адбіраліся па тэматыцы. Вядома, хацелася ўсіх адзначыць песнямі прыкладна так, як былі вясёлкава расквечаны колеры вышыванак і пякарства, пляцення, а таксама шчырых усмешак цудоўных лялек, зробленых умелымі рукамі.
У праграму канцэрта-ушанавання ўвайшлі песні “Деревня моя”, “Мир вашему дому”, “Калина”, “Дорога к маме”, “Желаем счастья вам!” і іншыя, назвы якіх былі знаёмы кожнаму і гаварылі самі за сябе.
Не абышлося ў гэты вечар без жартаў. Маналог Элеаноры Батурыцкай прыйшоўся даспадобы гледачу. З замілаваннем назіралі вяскоўцы за самымі маленькімі, бо сцэна для некаторых з іх была, вядома, сапраўдным выпрабаваннем. Але ўсе справіліся вельмі добра — адчуваліся адказная падрыхтоўка. Бібліятэкар Аксана Пяткевіч зазначае, што дапамагаюць у арганізацыі святаў сем,ямі — практычна ні адзін канцэрт у Слаўкаве не абыходзіцца без дуэта Антона і Марыны Енчыкаў. Раскрываюць музычныя таленты іх дачка Вікторыя і ўнук Максім.
Выкарыстаўшы магчымасць, павіншаваць песняй любімую бабулю М.У. Шчарбіцкую выйшлі на сцэну Марыя і Валерыя Сянкевіч. Сольныя нумары, музычныя падарункі ў выкананні вакальнай групы, дзіцячыя прыпеўкі і, вядома, памятныя гадзіннікі — падарункі ад Слаўкаўскага сельскага клуба — зрабілі гэты вечар для мясцовых майстрых запамінальным і па-сямейнаму цёплым.
Знамянальным студзень стаў і для мясцовых удзельнікаў мастацкай самадзейнасці. Дырэкцыя ААТ “Нясвіжскі райаграсэрвіс” падарыла ўстанове культуры апаратуру для правядзення клубных мерапрыемстваў.
Іна ВАСІЛЕВІЧ.