Нясвіжскія навіны Першыя словы азначаюць назву кнігі, якую выдаў мінчанін Аляксандр Каралёў, ён жа выканаўца песень у жанры “лірычны шансон”. Артыст і пісьменнік выступаў у раённым цэнтры культуры ў Нясвіжы. А перад гэтым прыйшоў на сустрэчу з чытачамі раённай бібліятэкі імя Паўлюка Пранузы. У канферэнц-зале сабраліся аматары чытання і работнікі бібліятэкі. А. Каралёў прэзентаваў свае кнігі “Тры дзявяткі” і “Чырвонае сонца”, расказаў пра іх стварэнне і адзначыў, што там выкарыстаны некаторыя праўдзівыя факты.
Аўтар уступіў у Саюз пісьменнікаў Беларусі, а пасведчанне яму ўручаў старшыня Мікалай Чаргінец. Першае апавяданне “Развітанне з любоўю” Аляксандр напісаў яшчэ ў школе. Цяпер ён працуе над раманамі “Золата Івана Грознага” і “Год дракона”.
Выканаўца піша песні і выступае з імі ў розных гарадах: Барысаве, Слоніме, Лідзе, Бярозе, Паставах. А яшчэ пабываў у Расіі: Смаленску, Бранску, Гагарыне, Вялікіх Луках. Такі геаграфічны дыяпазон дазваляе артысту быць у гушчыні жыцця, знаёміцца з рознымі людзьмі, прапагандаваць уласныя песні і нашу Беларусь.
Раіса Хвір,
г. Нясвіж.
