На Нясвіжчыне працягваецца акцыя “Нашы дзеці”, у якой прымаюць удзел прадстаўнікі самых розных структур, арганізацый і прадпрыемстваў. Сярод іх і Нясвіжскі аддзел Дэпартамента аховы МУС Рэспублікі Беларусь. Разам з Дзедам Марозам прадстаўнікі сілавых структур завіталі ў адну з устаноў адукацыі горада Нясвіжа і павіншавалі рабят, якім цяпер асабліва патрэбна падтрымка, хто часова аказаўся ў няпростых жыццёвых умовах.
Звяртаючыся да школьнікаў, начальнік Нясвіжскага аддзела Дэпартамента аховы падпалкоўнік міліцыі А.У. Грынкевіч і памочнік начальніка аддзела па ідэалагічнай рабоце і кадравым забеспячэнні капітан міліцыі А.С. Трусевіч павіншавалі дзяцей з надыходам зімовых канікулаў, пажадалі здароўя і дабрабыту, а таксама добрага адпачынку ў час канікулаў і поспехаў у вучобе надалей.
Потым з рук Дзеда Мароза кожны з юных удзельнікаў прыемнай сустрэчы пад ёлачкай атрымаў салодкія пачастункі. І хацелася верыць, што добрыя ўспаміны пра навагоднія святы ў памяці дзяцей захаваюцца надоўга, а дабрачынныя акцыі, якіх становіцца ўсё больш і больш у краіне, сагрэюць сэрцы кожнага маленькага жыхара Беларусі.
Час Навагодніх святаў — асаблівы. Гэта час цудаў. Дык няхай нашым дзецям будзе заўсёды добра. А падарункі і ўвага дзяржавы падтрымаюць іх веру ў дабрыню і міласэрнасць.
Іна ВАСІЛЕВІЧ.