15 лістапада ў яслях-саду № 4 г. Нясвіжа “Караблік дзяцінства” ў рамках Года гістарычнай памяці прайшла квэст-гульня “Падарожжа па родным Нясвіжы”. Яе мэтай з’яўлялася замацаванне ў выхаванцаў уяўленняў пра родны горад, развіццё пачуцця патрыятызму і гонару за малую Радзіму, а таксама далучэнне да багацця беларускай мовы.
Уся імпрэза адыгрывалася як падарожжа, а заданні як прыпынкі. Калі заданні выконваліся, дзеці атрымлівалі кавалачкі пазла — герба Нясвіжа. У ходзе падарожжа хлопцы адказвалі на пытанні пра Нясвіж, збіралі мазаіку і адгадвалі славутасці, нават пабывалі на інтэрактыўнай экскурсіі па прадпрыемствах нашага раёна. Самай творчай з’яўлялася апошняя частка мерапрыемства. Там дзеткі ва ўборах Радзівілаў расказвалі вершы, аўтарам якіх была іх выхавальніца. Паслухалі песню на роднай мове і атрымалі медалі.
На самай справе, адно з самых прыемных пачуццяў — гэта гонар за маладое пакаленне. Калі ты не толькі бачыш, як яно ўдзельнічае ў разнастайных гульнях і ўрачыстасцях, але і чуеш, як з дзіцячых вуснаў льецца родная, мілагучная беларуская мова.
Валерыя КОБАЗЕВА