Валерия КОБОЗЕВА Паважаныя чытачы, мы працягваем аповед пра месцы, якія займаюць асаблівае месца ў гісторыі нашай Нясвіжчыны. “Герой” сенняшняга матэрыялу — раёны гісторыка-краязнаўчы музей.
Адрас: вул. Ленінская, 96.
Нясвіжскі гісторыка-краязнаўчы музей размясціўся ў будынку канца ХІХ стагоддзя, які, па некаторых звестках, быў пабудаваны для рамеснага вучылішча. Пазней памяшканні былі прыстасаваныя для патрэб вайскоўцаў. У 1991 годзе пачалася рэканструкцыя будынка для музея, які адкрыўся 14 студзеня 1995 года. На тэрыторыі таксама знаходзяцца драўляныя хаткі, свірны і студні, якія ілюструюць жыццё Нясвіжа ў мінулым і пазамінулым стагоддзях.
Асноўны фонд музея па стане на 1 студзеня гэтага года налічваў 13687 музейных прадметаў, фонд навукова-дапаможных матэрыялаў складае 2532 адзінак захоўвання. Усе прадметы размеркаваны па 18 калекцыях. Экспазіцыя прысвечана гісторыі горада і краю ў цэлым. Першая зала носіць назву “зберагаючы самабытнасць”. Тут турыстам прадстаўлены прадметы сялянскага побыту, мэбля, касцюмы і ўзоры дэкаратыўна-прыкладнога мастацтва. Суседняя зала прысвечана рамёствам і промыслам нясвіжан у розныя эпохі.
Асобная экспазіцыя распавядае пра жыццё князёў Радзівілаў. У вітрынах прадстаўлены іх асабістыя рэчы, а сама зала ўпрыгожана карцінамі і габеленамі і абстаўлена сапраўднай мэбляй XVIII-XIX стст. Не менш цікава наведаць залу воінскай славы і выставу “Выратаваныя каштоўнасці”, дзе прадстаўлены абразы, выратаваныя з касцёлаў і манастыроў у савецкую эпоху.
