13 сакавіка ў сценах будынка Цэнтральнай Выбарчай Камісіі чатырнаццаць падлеткаў з усёй рэспублікі атрымалі свае першыя пашпарты. У святочнай атмасферы галоўны дакумент грамадзяніна хлопцам і дзяўчатам уручыў старшыня ЦВК Ігар Карпенка. Разам з ім дзяцей віншаваў першы сакратар ЦК БРСМ Аляксандр Лук’янаў.
Адным з тых, каму выпаў гонар паўдзельнічаць ва ўрачыстасці, стаў несвіжанін Максім Сачук.
Падлетак — вучань 8 класа сярэдняй школы №3 г. Нясвіжа, удзельнік раённых этапаў алімпіяд па матэматыцы і працоўным навучанні, а таксама дыпламант І ступені раённай выставы дэкаратыўна-прыкладнога мастацтва “Вясёлка творчасці”.
Максім не хавае, што хваляваўся ў той дзень:
— Вядома ж, гэта для мяне вельмі адказна і ганарова — атрымаць сведчанне таго, што я цяпер паўнавартасны грамадзянін сваёй краіны, ды яшчэ і паціснуць рукі такім высокапастаўленным асобам.
Але ж і прыемнае хваляванне мяне ахоплівала, радасць. Цяпер нават неяк па-іншаму сябе адчуваю, больш свядома, мабыць.
У падарунак новаспечаныя ўладальнікі пашпартоў традыцыйна атрымалі Дзяржаўны сцяг і Канстытуцыю.
— Я лічу асабліва знакавым той момант, што ўручэнне пашпартоў адбываецца напярэдадні Дня Канстытуцыі Рэспублікі Беларусь, у рамках Усебеларускай акцыі “Мы — грамадзяне Беларусі”, — дзеліцца ўражаннямі Максім. — Зараз я мушу больш дэталёва азнаёміцца з Асноўным Законам, сваімі правамі і абавязкамі.
Я бываў у розных краінах, але свая — даражэй за ўсе. Я ёю ганаруся і хачу, каб у будучыні Беларусь выйшла ў сусветныя лідары. Як грамадзянін буду старацца прыкладаць для гэтага ўсе намаганні.
Думаю, гэтае святочнае мерапрыемства надоўга застанецца ў маёй памяці.
Дар’я ПІВАВАРСКАЯ.