Нясвіжскія навіны Ва ўнутраным двары Нясвіжскага палаца ўчора адкрыўся трэці творчы праект «Вяртанне да тэатральных вытокаў». Распачалі творчыя вечары артысты заслужанага калектыву аматарскага тэатра імя Уршулі Радзівіл прэм’ерай — французскай камедыяй «Вячэра дурняў» Франсіса Вэбера.
Пра аднаго з герояў камедыі палажэнняў напявалі падчас спектакля «Тут жыве П’ер Брошан, самы злы з парыжан». Сапраўды, трэба быць вельмі нядобрым чалавекам, каб кожную сераду ўладкоўваць з сябрамі забаву пад назвай «Вячэра дурняў» і прыводзіць на гэтую пацешную вячэру прасцяка і недарэку з мэтай удосталь над ім пасмяяцца. Але вось аднойчы ў П’ера Брошана вечар серады пайшоў зусім па іншым сцэнары. Па законе жанру заўсёды здараецца гэта «аднойчы», якое пераварочвае ўсё дагары дном і ўжо не ясна, хто добры, а хто злы, хто разумны, а хто дурань. І раптам аказваецца, што ёсць важнейшыя чалавечыя якасці, чым самы востры розум…
Артысты бездакорна выканалі свае ролі, выклікаўшы ў гледачоў шэраг моцных эмоцый. Сярод их — Леанід Буднік, Мікалай Клімко, Андрэй і Максім Курганскія, Анастасія Румянцава і Яўгенія Гардзіевіч.
Сёння аматараў мастацтва чакае трагікамедыя «Чалавек, які плаціць» Іва Жаміака, якая таксама будзе ўпершыню выконвацца нясвіжскімі тэатральнымі акцёрамі.
