Новы віток жыцця

У чацвер у рамках рэспубліканскай акцыі “Ад усёй душы” на Нясвіжчыне ўшаноўвалі 100-гадовую доўгажыхарку.

Жыхарка г.п. Гарадзея Кацярына Аляксееўна Міхалкова доўгія гады адпрацавала настаўнікам пачатковых класаў і з’яўляецца ветэранам сярэдняй школы №2 г.п. Гарадзея. 4 студзеня намеснік начальніка Нясвіжскага РАУС Алег Клачко ў азнаменаванне чарговага вітка жыцця ўручыў паважанай юбілярцы новы пашпарт.

Павіншаваць Кацярыну Аляксееўну з цудоўнай датай прыехала шмат гасцей. Сярод іх былі намеснік старшыні раённага выканаўчага камітэта Аляксандр Балцянкоў, начальнік упраўлення па працы, занятасці і сацыяльнай абароне райвыканкама Таццяна Толсцік, загадчык вучэбна-метадычнага кабінета ўпраўлення па адукацыі, спорце і турызме райвыканкама Таццяна Вайтовіч, педагогі і навучэнцы сярэдняй школы №2 г.п. Гарадзея, прадстаўнікі раённага тэрытарыяльнага цэнтра сацыяльнага абслугоўвання насельніцтва, Гарадзейскага пасялковага Савета, раённых арганізацый грамадскіх аб’яднанняў “Белая Русь”, “Беларускі саюз жанчын”, “Беларускі Чырвоны Крыж”. Да віншаванняў далучыліся і артысты раённага цэнтра культуры, якія выканалі ўсімі любімую песню “Сто гадоў” з рэпертуару ансамбля “Сябры”.

Жадаючы юбілярцы доўгіх гадоў жыцця, намеснік старшыні райвыканкама Аляксандр Балцянкоў зазначыў, што К.А. Міхалкова вартая павагі і захаплення. Яна пражыла стагоддзе, з’яўлялася сведкам і ўдзельнікам шматлікіх гістарычных падзей і самае галоўнае — засталася моцным і добрым чалавекам, які ўмее цешыцца жыццём і па-філасофску ставіцца да ўсіх зменлівасцей лёсу, выгадавала сына і дачку.

На пытанне аб сакрэце даўгалецця Кацярына Аляксееўна адказала проста: гэта рух. Кожны дзень, часам пераадольваючы сябе, трэба выходзіць на шпацыр, знаходзіць справы, якія зоймуць цябе.

Пагутарыўшы са 100-гадовай доўгажыхаркай, старшыня Нясвіжскага раённага аддзялення грамадскай арганізацыі “Беларускі саюз жанчын” Таццяна Шумоўская сказала, што гэта вялікі гонар — мець зносіны з такой мудрай і добрай жанчынай.

— Для мяне гонар, што сярод нас ёсць такія выдатныя людзі, — адзначыла Таццяна Віктараўна.
Не абышоўся гэты цудоўны дзень і без кветак і падарункаў ад гасцей. Што ж, як спявалі імянінніцы таленавітыя артысты Нясвіжчыны, жадаем адной са старэйшых жыхарак рэгіёна «…у шчасці і радасці жыць».

Неаніла ЛЮБАНЕЦ.