Инна ВАСИЛЕВИЧ Веснавыя палявыя работы ў ААТ «НОВАЕ ЖЫЦЦЁ» сёлета пачаліся раней звычайнага. Як толькі з палеткаў сышоў снег, механізатары пачалі ўносіць азотныя ўдабрэнні. Яшчэ да першых выездаў у поле ўся тэхніка была падрыхтавана руплівымі працаўнікамі сельгаспрадпрыемства — энерганасычаныя трактары, правераныя прычэпы і плугі чакалі веснавога старту. А дадзены ён быў 4 сакавіка, што на 14 дзён раней мінулагодняга тэрміну.
— Прырода ўнесла свае карэктывы ў нашу работу, але мы былі гатовы — усе транспартныя сродкі, задзейнічаныя ў веснавых палявых работах, прайшлі дзяржаўны тэхагляд, спадзяёмся, што не падвядуць.
Зараз уносім мінеральныя ўдабрэнні, арганіку, праводзім культывацыю глебы, механізатары шчыруюць на ворыве і дыскаванні, — расказвае галоўны аграном сельгаспрадпрыемства Міхаіл Канановіч. — Асноўныя плошчы ў гэтым годзе адведзены пад яравую сяўбу. Так, 250 гектараў зойме ячмень, кукурузу на зерне і сілас плануем размясціць на 500 і 700-гектарных плошчах адпаведна. 420 гектараў зоймуць цукровыя буракі.
Праца на зямлі — адна з самых адказных. А поспех сельгаспрадпрыемства — вынік работы і старання ўсяго калектыву, — пад- крэслівае Віктар Худніцкі, дырэктар адной з валаўтваральных гаспадарак раёна, дзе штогод дасягаюцца высокія паказчыкі ў раслінаводстве.
Ад таго, наколькі своечасова пройдуць веснавыя палявыя работы, залежыць не толькі ўра- джайнасць хлебнай нівы, але і нарыхтоўка кармоў для жывёлагадоўчай галіны, якая ў “НОВЫМ ЖЫЦЦІ” штогод атрымлівае новы віток развіцця. Тут робяць усё магчымае і разлічваюць на павышэнне аб’ёмаў вытворчасці малака, якое практычна ўсё прадаецца вышэйшым гатункам.
Як кажуць, што ў каровы будзе на языку, такая будзе і аддача па малаку. Таму і веснавыя работы на асаблівым кантролі.
Загадзя паклапаціліся ў сельгаспрадпрыемстве пра тэхнічнае абсталяванне машынна-трактарнага парку. У мінулым годзе было закуплена больш за дзе- сяць адзінак тэхнікі. Парк папоўнілі некалькі грузавых аўтамабіляў, самаходны пагрузчык “МАНІТУ”, корманарыхтоўчы камбайн “Нью Холанд”, два збожжаўборачных “КЗС-1218”, сеялкі — для пасеву цукровых буракоў і кукурузная, апырсквальнік “Амазоне” і некалькі энерганасычаных трактароў. Усе транспартныя адзінкі давераны адказным механізатарам гаспадаркі.
Веснавы дзень хоць і павялічваецца, але вяскоўцы працуюць на палях без перапынку — каб зэканоміць час, на поле ім дастаўляюць гарачыя абеды, дзевяноста працэнтаў кошту якіх бярэ на сябе сельгас- прадпрыемства.
Наперадзе ў “НОВАГА ЖЫЦЦЯ” шмат планаў і перспектыўных задум. Работнікі прадпрыемства не збіраюцца спыняцца на дасягнутым. А пакуль шчыруюць на веснавых палетках гаспадаркі, бо добра ведаюць, што веснавы дзень год корміць.
Віктар Буйко — адзін з лепшых механізатараў гаспадаркі. Яго працоўны стаж — больш за трыццаць гадоў.
Некалі, скончыўшы Казлоўскую школу, вясковы хлопец вырашыў застацца ў родным калгасе. Яшчэ школьнікам у Сноўскім навучальна-вытворчым камбінаце атрымаў запатрабаваную ў сельскай гаспадарцы рабочую спецыяльнасць разам з пасведчаннем трактарыста. Перад арміяй па накіраванні ваенкамата адвучыўся ў аўташколе і адкрыў яшчэ адну вадзіцельскую катэгорыю.
— З дзяцінства люблю тэхніку, таму і вырашыў застацца працаваць у сельскай гаспадарцы. Зараз кірую новым “Джон Дзірам”. Трактар, як кажуць, па апошнім слове тэхнікі, камфортная машына. Зімой працаваў на ёй на вывазцы арганікі. У дзень у бурты выгружаў да 200 тон, — дзеліцца Віктар Іванавіч.
Сёння за 9-корпусным плугам яго трактара штодня застаецца 25-27 гектараў пульхнай раллі. А пасля закрыцця вільгаці Віктара Буйко чакае сяўба ячменю і траў.
— Усюды трэба адказна працаваць, тады і вынік будзе радаваць, — сцвярджае ён. — Ды і што казаць, усім я задаволены: добрая тэхніка, тут у вёсцы мая сям’я — жонка, сын, дачка. Жывём у доме, які выдзеліла гаспадарка.
Віктар Буйко неаднаразова выходзіў пераможцам сярод трактарыстаў-машыністаў у спаборніцтвах рознага ўзроўню. Радуецца, што справа ладзіцца. А для гэтага механізатар заўсёды своечасова пачынае свой новы рабочы дзень. Разумее, што вясной для яго, як і летам у час жніва для хлебароба, дарагая кожная хвіліна, бо трэба многае паспець, і ён спадзяецца, што ўсё атрымаецца.
Аляксандр Надольскі два гады як прыйшоў у ААТ «НОВАЕ ЖЫЦЦЁ».
Адразу далі трактар. Свой “МТЗ-3022” ён стараецца ўтрымліваць па-гаспадарску,
як і прычапныя прылады да яго (плуг, касу, культыватар). На гэтым тыдні механізатар
быў задзейнічаны на закрыцці вільгаці, вывазцы арганікі на палі.
Сяргей Кандрацюк працуе ў “НОВЫМ ЖЫЦЦІ” з 2007 года. Адказна ставіцца да даручанай справы. Вясной мінулага года атрымаў новы трактар. Свой энерганасычаны “МТЗ-3522” трымае ў парадку.
У гэтыя веснавыя дні малады механізатар працуе на закрыцці вільгаці, падрыхтоўцы глебы
да пасяўной, а таксама вывозіць вадкую арганіку на палі.
Аляксандр Надольскі і Сяргей Кандрацюк на закрыцці вільгаці разам выпрацоўваюць да 100 гектараў у дзень
Іна ВАСІЛЕВІЧ.
