Нясвіжскія навіны Сёння аграрыі “Агракамбіната Нясвіжскі ” ўсю ўвагу аддаюць уборачнай кампаніі — ураджай выспеў амаль на два тыдні раней, і асноўныя сілы сельгаспрадпрыемства задзейнічаны на палях.
Першым на палеткі паклікаў азімы ячмень, які, нягледзячы на частыя кліматычныя змены, паказвае добрую ўраджайнасць — да 66 цэнтнераў з гектара. У бягучым годзе гэтай культуры тут трэба ўбраць на 50 гектараў больш, бо пасевы былі павялічаны. Усяго пад азімы ячмень адведзена 390 га.
Калі спрыяе надвор’е, у дзень за камбайнамі застаецца да 55 гектараў ячменнага ржышча, якое ў хуткім часе пасля ўнясення ўдабрэнняў будзе выкарыстана пад пасевы новай культуры. А пакуль па полі снуюць збожжаўборачныя камбайны, аўтамабілі і прэспадборшчыкі.
Усяго на палях агракамбіната задзейнічаны пяць камбайнавых экіпажаў. Сярод вопытных механізатараў — Яўген Пабока, Сяргей Пражэнік, Дзмітрый Цымбал, Ілля Гапановіч, Дзмітрый Максіменя і іншыя.
Да кожнага камбайнавага экіпажа прымацавана транспартная адзінка, якая адвозіць збожжа з поля. На адвозцы ураджаю працуюць вадзіцелі Уладзімір Пракаповіч, Мікалай Дзявойна, Станіслаў Жыгулін і інш.
Удзельнікі жніва забяспечаны абедамі і падвячоркамі, а таксама пітной мінеральнай вадой.
У бліжэйшыя дні, калі дазволіць надвор’е, увесь азімы ячмень будзе ўбраны. На чарзе — азімы рапс, пад які ў ЗАТ “Агракамбінат Нясвіжскі” адведзена 350 га.
