У Год беларускай жанчыны раённая газета сумесна з Нясвіжскім гісторыка-краязнаўчым музеем ажыццяўляе праект “Беларусачка: культурны код Нясвіжчыны”.
Гераіняй чацвёртага выпуску нашага праекта стала Таццяна Жукавец — спецыяліст па сацыяльнай рабоце аддзялення сацыяльнай рэабілітацыі, абілітацыі і актыўнага даўгалецця. На здымку Таццяна ў нацыянальным беларускім касцюме. Яна вельмі засяроджаная на працэсе прадзення, цалкам пагружаная ў атмасферу стваральнай жаночай працы нашых продкаў.
У цэнтры ўвагі — верацяно, той самы легендарны інструмент, з якога пачыналася мастацтва стварэння тканіны. Гэтая бясхітрасная на першы погляд прылада — драўляная палачка, завостраная ўверсе і патоўшчаная знізу, — стагоддзямі служыла верным памочнікам кожнай гаспадыні. Звычайна верацяно даўжынёй ад 20 да 80 см вырабляліся з трывалага сухога дрэва, часцей за ўсё з бярозы.
Дакрананне да гэтага старажытнага артэфакта падарыла Таццяне незабыўныя эмоцыі, дазволіўшы літаральна адчуць сувязь часоў. Яна прызнаецца, што шчыра ганарыцца багатай гісторыяй роднага краю. Гэта пачуццё датычнасці да вытокаў гераіня перадае і сваім блізкім: у яе сям’і беражліва захоўваюць культурныя традыцыі і прывіваюць падрастаючаму пакаленню глыбокую павагу да нацыянальнага кода. Для Таццяны пераемнасць — гэта не проста словы, а фундамент, на якім будуецца сувязь паміж мінулым і будучым.
Нагадваем: Нясвіжскі гісторыка-краязнаўчы музей у межах акцыі “Кожная пятніца — роднае, сваё” прапануе несвіжанкам і гасцям горада зрабіць памятнае фота ў беларускім нацыянальным строі. Прапанова дзейнічае кожную пятніцу з 11.00 да 13.00, з 17.00 да 19.00. Папярэдні запіс па тэлефонах: 8 01770 5-33-84 і 8 01770 2-06-34 — абавязковы.
