У Год беларускай жанчыны раённая газета сумесна з Нясвіжскім гісторыка-краязнаўчым музеем ажыццяўляе праект “Беларусачка: культурны код Нясвіжчыны”.
Прадстаўляем вашай увазе гераіню нашага пятага выпуску — дзіўную і шматгранную Таццяну Рачок. Ураджэнка аграгарадка Сноў, яна нібы саткана з творчай энергіі: Таццяна не проста займаецца дызайнам, яна прафесійна ставіць утульнасць на першае месца, ператвараючы прастору вакол сябе ў квітнеючы сад, напаўняючы дом водарам хатніх пірагоў. Яе кулінарныя шэдэўры — гэта сапраўднае прызнанне ў любові блізкім, увасобленае ў цесце і клопаце.
У нашым праекце Таццяна выступае ў нацыянальным беларускім строі, трымаючы ў руках сімвал хатняга ачага — збан. Гэта традыцыйны гліняны посуд з характэрным падоўжаным сілуэтам і вузкім рыльцам, у якім схавана памяць пакаленняў: калісьці ў збанах тамілася ў печах парное малако, захоўвалася густая смятана і настойваліся лекавыя напоі.
Для Таццяны культурны код роднага краю — гэта не сухія факты з падручнікаў, а жывое пачуццё шчырага гонару. Яна перакананая: сёння як ніколі важна берагчы і трансляваць традыцыі, бо толькі так мы зможам перадаць нашым дзецям ключы да разумення сваіх каранёў і навучыць іх шанаваць спадчыну продкаў.
Нагадваем: Нясвіжскі гісторыка-краязнаўчы музей у межах акцыі “Кожная пятніца — роднае, сваё” прапануе несвіжанкам і гасцям горада зрабіць памятнае фота ў беларускім нацыянальным строі. Прапанова дзейнічае кожную пятніцу з 11.00 да 13.00, з 17.00 да 19.00. Папярэдні запіс па тэлефонах: 8 01770 5-33-84 і 8 01770 2-06-34 — абавязковы.
Ганна КІСЕЛЬ.
