У Год беларускай жанчыны раённая газета сумесна з Нясвіжскім гісторыка-краязнаўчым музеем ажыццяўляе праект “Беларусачка: культурны код Нясвіжчыны”.
Гераіня шостага выпуску нашага праекта — Вольга Клімовіч з аграгарадка Грыцкевічы. Вольга не толькі цудоўная гаспадыня, але і таленавітая майстрыха, якая беражліва захоўвае традыцыі продкаў.
На фотаздымку яна пазіруе ў нацыянальным беларускім строі з ажурнай хусткай ручной працы. Такія «павуцінкі» ўтвараюцца з натуральнага казінага пуху або воўны. Гэта тонкая, амаль ювелірная праца, якая патрабуе высокага майстэрства і цярпення.
Сакрамэнты ажурнага пляцення Вольга пераняла ад бабулі мужа, Людмілы Мікалаеўны Заяц. Творчы шлях гераіні пачаўся ў перыяд дэкрэтнага адпачынку, і з таго часу рукадзелле стала яе любімай справай. Сёння Вольга ўтварае элегантныя шалі, цёплыя хусткі і ўтульныя рэчы для дзяцей, працягваючы перадаваць прыгажосць народнага рамяства.
Нагадваем: Нясвіжскі гісторыка-краязнаўчы музей у межах акцыі “Кожная пятніца — роднае, сваё” прапануе несвіжанкам і гасцям горада зрабіць памятнае фота ў беларускім нацыянальным строі. Прапанова дзейнічае кожную пятніцу з 11.00 да 13.00, з 17.00 да 19.00. Папярэдні запіс па тэлефонах: 8 01770 5-33-84 і 8 01770 2-06-34 — абавязковы.
Ганна КІСЕЛЬ.
