5 чэрвеня ў Нясвіжы ўрачыста прайшло свята Божага Цела — галоўнае свята касцёла, які носіць такую ж назву.
У свяце прынялі ўдзел Генеральны вікарый Мінска-Магілёўскай архідыяцэзіі біскуп Юрый Касабуцкі, які цэлебраваў святую імшу, пробашч парафіі Божага Цела, дэкан Нясвіжскага дэканата, ксёндз-канонік Пётр Шарко і вікарый касцёла Яўген Баланёў, ксяндзы Павел Слука з Клецка, Аляксандр Вітко — з Гарадзеі, а таксама ўраджэнец Нясвіжа, ксёндз Аўгуст Калясінскі.
Пасля святой імшы ў касцёле вернікі прайшлі з урачыстай працэсіяй па горадзе, дзе спыняліся каля чатырох сімвалічных алтароў. Перад кожным з іх былі прамоўлены малітвы аб абароне горада і яго жыхароў ад хвароб і іншых няшчасцяў.
Яскравым момантам свята стала адкрыццё ў касцёле выставы здымкаў фатографа Святланы Польскай “Святло душы”, на якой былі адлюстраваны розныя падзеі з жыцця парафіі — ад святых імшаў, прысвечаных першай камуніі, да вялікіх святаў, прысвечаных юбілейным і памятным датам, звязаным з гісторыяй касцёла.
Многія пазнавалі на выстаўленых фатаграфіях князёў Мацея і Мікалая Радзівілаў, мітрапаліта Мінска-Магілёўскай архідыяцэзіі Тадэвуша Кандрусевіча, сваіх родных і блізкіх, якімі яны былі некалькі гадоў таму.
Соф’я ЛЮБАНЕЦ.
Фота Святланы ПОЛЬСКАЙ.