У мінулую пятніцу на набярэжнай Бернардзінскай сажалкі
несвіжане і госці горада гучна развіталіся з летам, стаўшы сведкамі фестывалю закрыцця самага яркага,
крэатыўнага і непаўторнага летняга сезону 2022 года “Правядзём лета разам”.
Пляцоўка каля вады пераўтварылася ў зону рознага кшталту актыўнасцей. Тут разгарнуліся фотазоны, майстар-класы, сувенірныя лаўкі, батуты, атракцыёны. Жадаючыя маглі нанесці аквагрым, пакаштаваць поп-корн і салодкую вату.
Сваю дзейнасць і поспехі ў творчасці ў рамках “Арт-алеі” дэманстравалі дамы і цэнтры культуры раёна. Тут было ўсё: і ўзнагароды за пэўныя дасягненні, і ўзоры вырабаў дэкаратыўнай творчасці, і нават прысмакі, якімі частавалі наведвальнікаў.
Свой інтэрактыў арганізавалі і прадстаўнікі РАНСа. Яны ў чарговы раз нагадалі аб правілах бяспекі праз пазнавальныя гульні, прапанавалі прымераць форму выратавальніка, пазваніць па нумары экстранных службаў 112 і прайсці анлайн-тэсты.
Фотазону, а таксама стэнд са шматлікімі кніжнымі навінкамі прадставіла і цэнтральная раённая бібліятэка імя Паўлюка Пранузы.
Запрашалі прысутных стаць падпісчыкамі і зрабіць памятныя фота і мы — працаўнікі рэдакцыі. Жадаючыя змаглі пагуляць у латарэю, скласці пазлы і паспрабаваць сябе ў ролі наборшчыка тэксту за друкарскай машынкай. Ніхто з тых, хто завітаў да нас, не пайшоў без цукерачкі з пажаданнем.
А сёмай гадзіне распачалася ўрачыстая частка свята — канцэрт ад лепшых гуртоў і выканаўцаў Нясвіжчыны “Музыка нас звязала”.
Відовішчным атрымалася дэфіле летніх мадэляў “Вясна-лета” сезона-2023, калекцыю для якога прадставіла ЗАТ “Калінка”.
Прыемным падарункам для несвіжан стала выступленне артыстаў беларускай эстрады Тэа і Вольгі Рыжыкавай.
Завяршылася свята дыскатэкай “Летні вайб”.
Дар’я ПІВАВАРСКАЯ.
Фота Ірыны ЛУЧЫНОВІЧ.