Нясвіжскія навіны Дарагія чытачы, мы працягваем знаёмства з месцамі, якія займаюць асаблівае месца ў гісторыі нашага горада, якая вядзе адлік з сярэдніх вякоў. А ці ведаеце вы, што ў Нясвіжы нават ёсць памятны знак у гонар правядзення фестывалю сярэднявечнай культуры?
Адрас: вул. Чкалава.
3 і 4 ліпеня ў сэрцы Беларусі, старажытным Нясвіжы, прайшоў найбуйнейшы ва Усходняй Еўропе фестываль сярэдневечнай культуры, прымеркаваны да 780-годдзя горада Нясвіжа, што лічыцца ад 1223 года, калі князь Юрый Нясвіжскі прыняў удзел у бітве з манголамі Чынгізхана на Калцы.
У фестывалі прынялі ўдзел больш за 40 рыцарскіх клубаў з Беларусі, Расіі, Украіны, Польшчы, Латвіі, Чэхіі рознай накіраванасці. У дэфіляднай калоне налічвалася больш за тысячу рыцараў, збраяносцаў, лучнікаў і прыгожых паненак. Акрамя рыцараў у фэсце ўзялі ўдзел шматлікія мастацкія калектывы з розных краін свету, якія спецыялізуюцца на творах сярэдневечнай музычнай, вакальнай і танцавальнай культуры. Былі рэпразантаваны сярэднявечныя рамёствы, гандаль, кухня. На працягу двух дзён Нясвіж вярнуўся да сярэднявечнага жыцця. Па вуліцах хадзілі дзяўчаты ў доўгіх сукенках, скакалі на конях рыцары.
У парках варыліся ў катлах розныя смачнасці, а па вечарах спявалі песні і танцавалі. На памяць аб гэтых дзіўных днях быў усталяваны камень з выразаным рыцарскім шчытом і бронзавай дошкай.
