Даўно вядома, што філіял Нясвіжскае УМГ ААТ “Газпром трансгаз Беларусь” — адна з самых прыхільных да актыўнага і здаровага ладу жыцця арганізацый у нашым раёне, сапернічаць з якой па спартыўных перамогах пакуль можа толькі СВК “Агракамбінат Сноў”.
Вось і сёння тут адбылася знакавая падзея — лепшыя спартсмены-аматары прадпрыемства атрымалі залатыя, сярэбраныя і бронзавыя значкі “Фізкультурнік Беларусі” і пасведчанні да іх.
Узнагароджаных павіншавалі і пажадалі ім далейшых спартыўных поспехаў начальнік філіяла Сяргей Лапін, намеснік старшыні Нясвіжскага райвыканкама Аляксандр Балцянкоў, дырэктар фізкультурна-аздараўленчага цэнтра Нясвіжскага раёна Дзмітрый Рыжыкаў.
Як адзначыў Дзмітрый Рыжыкаў, значок “Фізкультурнік Беларусі” зарабіць вельмі няпроста — пасведчанні на залатыя значкі падпісвае асабіста міністр спорту і турызму Рэспублікі Беларусь, а на сярэбраныя і бронзавыя — начальнік галоўнага ўпраўлення па спорце і турызме Мінскага аблвыканкама. Для таго каб іх атрымаць, чалавек павінен выканаць нарматывы Дзяржаўнага фізкультурна-аздараўленчага комплексу Рэспублікі Беларусь, што не так лёгка зрабіць. Гэтых нарматываў, накіраваных на праверку сілы, цягавітасці і хуткасных якасцей, восем, і іх можна здаваць з 6 да 80 гадоў у кожнай узроставай катэгорыі. У Нясвіжскім УМГ гэты комплекс стаў папулярным апошнія пяць гадоў, і на сённяшні дзень уладальнікамі значка “Фізкультурнік Беларусі” тут сталі ўжо 46 чалавек. Дарэчы, з 2022 года, акрамя залатога, былі ўведзены яшчэ сярэбраны і бронзавы значкі, каб стымуляваць людзей на самаўдасканаленне і дасягненне найлепшых вынікаў.
Сёння ў гэты ганаровы спіс увайшлі ўладальнікі залатых значкоў Валерый Кныш, Аляксандр Кароль і Фёдар Крупец. Сярэбраных былі ўдастоены Алена Кароль (на момант здачы нарматываў — Няглюй) і Анастасія Колас. Бронзавыя значкі атрымалі Марына Баўтрэль, Ігар Лашук, Андрэй Шалкоўскі, Сяргей Капытка і Дзмітрый Куркоў.
Соф’я ЛЮБАНЕЦ.