З мэтай пазнаёміць дзяцей з багаццем беларускай літаратуры ў гульнявой форме Гарадзейская гарпасялковая бібліятэка сумесна з Навагарадзейскай сельскай бібліятэкай арганізавалі інтэрактыўную праграму для навучэнцаў 1-6 класаў аздараўленчага лагера «Рамонак» ДУА «СШ №1 г. п. Гарадзея».
Удзельнікам мерапрыемства стварыць «Імідж па-беларуску» дапамаглі кнігі беларускіх пісьменнікаў.
Яшчэ на ўваходзе ў Гарадзейскі гарпасялковы дом культуры гасцей сустракалі бібліятэкары ў нацыянальных беларускіх касцюмах. У фае дзяцей чакалі выставы «Беларуская паліца — модна, сучасна» і прысвечаная Году беларускай жанчыны — «Чараўніцы кніжнага краю». А таксама куток «Беларуская хатка».
Ў глядзельнай зале для дзяцей пачалося займальнае інтэрактыўнае шоу з гульнямі «Апрані героя», конкурсам «Модны заплечнік», экспрэс-тэатрам «Жывы вобраз», віктарынай «Праўда ці не праўда», пантамімай «Пакажы сваю сяўбу» і загадкамі «Дзеда Кандрата».
Наша зямлячка, паэтка Людміла Трэццякова правяла са школьнікамі творчы практыкум, ствараючы «Кніжнае сэрца Беларусі».
У фінале адбыўся паказ мод «Разумнікі і Разумніцы».
Напрыканцы мерапрыемства юныя ўдзельнікі атрымалі яркія закладкі для кніг з тэкстам «Чытаць па-беларуску — гэта стыльна!» і салодкія прызы.
