КІРМАШ
У нядзелю, 26 верасня, на цэнтральным рынку Нясвіжа прайшоў першы асенні кірмаш. Уласную прадукцыю – зерне, бульбу, розную гародніну, рыбу, каўбасныя і мясныя вырабы, кандытарскія прысмакі – прапанавалі прад-прыемствы раёна. Працавалі кропкі выязнога гандлю. Тыя, хто наведаўся сюды ў гэты дзень, набывалі моркву, сталовыя буракі і капусту з запасам.
ЗАТ “1 Мая” рэалізоўвала бульбу па 850 рублёў за кілаграм, капуста і морква каштавалі 800 рублёў, буракі – 700, цыбуля – 1300. Пшаніцу па 480 рублёў і ячмень па 350 разабралі ў першую чаргу, як толькі пачаўся гандаль.
Як паведаміла намеснік старшыні па ідэалагічнай рабоце СВК “Юшавічы” Г.Я. Жывень, на кірмаш прадпрыемства рыхтавалася загадзя, фуражны ячмень і трыцікале прывезлі разважаным – па 40 кг. Кошт выстаўлялі адпаведна – 18100 і 13700 рублёў за мяшок. Вадзіцелю У.Я. Сухаверху адпускаць прадукцыю было зручна, тым больш, што першым быў аптовы пакупнік.
У пачатку дзевятай гадзіны на машыне СВК “Сейлавічы” заставалася непрададзенай толькі бульба, якую рэалізоўвалі па 900 рублёў. Тут жа стаялі пакупнікі-несвіжане, якія зазначылі, што ўжо не першы год набываюць “другі хлеб” гэтага прадпрыемства і вельмі задаволены.
Загадчыца магазіна “Верасок” СВК “17 верасня” Я.В. Макарэвіч на працягу паўгадзіны прадала тону ячменю па 300 рублёў за 1 кг. Акрамя гэтага, на кірмаш вывезлі 960 кг кукурузы па 600 рублёў, 400 кг сталовых буракоў па 750 і столькі ж морквы па 900 рублёў.
– Да выязнога гандлю эксперыментальная база “Ганусава” падрыхтавала авёс (250 рублёў за 1 кг), пшаніцу (380 рублёў), ячмень (350 рублёў), – расказвае намеснік дырэктара дзяржаўнага прадпрыемства М.В. Сінкевіч. – Адразу прадалі мёд – па 25 тысяч за кілаграм. Прапануем новыя сарты бульбы “Зарніца” і “Янка” па 900 рублёў. Многія пакупнікі ведаюць, што збожжа наша ачышчанае, таму за доўгія гады ўдзелу ў сельскагаспадарчых кірмашах прадпрыемства набыло пастаянных кліентаў.
На грузавым аўтамабілі ААТ “Новае жыццё” гаспадарыў вадзіцель Павел Карачун:
– Прывезлі моркву па 900 рублёў за 1 кг, пшаніцу па 450 рублёў, ячмень па 300 і кукурузу па 650. Ячмень адразу пайшоў і пшаніца таксама. Моркву амаль усю прадалі. У сем рані-цы ў нас ужо былі пакупнікі.
І сапраўды, на першы раённы кірмаш пакупнікі прыйшлі з сямі раніцы, калі прадаўцы рыхтаваліся да гандлю і толькі адкрылі барты грузавікоў сельгаспрадпрыемстваў. А палове восьмай дбайныя гаспадары разбіралі парсючкоў з машыны ААТ “Нясвіжскі райаграсервіс”. За нейкую гадзіну загадчыца свінатаварнай фермы Н.А. Пласкавіцкая і заатэхнік Т.В. Каранкевіч прадалі амаль дваццаць гадаванцаў па 12100 за кілаграм жывой вагі.
Парсючкі СВК “Лань-Нясвіж” таксама адразу знайшлі сваіх новых гаспадароў.
– Гэта мясная парода “Ландрас”, – паведаміла начальнік цэха ўзнаўлення свінакомплексу Г.У. Халмагорава. – За 7-8 месяцаў парасяткі дасягаюць добрай вагі – да 150 кілаграмаў. Таму людзі набываюць іх для асабістай гаспадаркі і водгукі вельмі добрыя.
Адна з гандлёвых кропак у гэты дзень належала ААТ “Альба”. Карпа па 6900 рублёў за 1 кг і адборнага карася па 4500 рэалізоўваў вадзіцель і прадавец І.С. Іваноў.
– Нясвіжская рыба карыстаецца попытам не толькі ў раёне. Прадаём яе па ўсёй Беларусі. Апошнія кірмашы, куды выязджалі, былі ў Мінску і Мядзелі, – паведаміў ён.
Як заўсёды, больш за ўсё людна каля гандлёвага павільёна фірменнага магазіна № 8 “Агракамбіната Сноў”. Мясных і малочных прадуктаў у час выязнога гандлю было рэалізавана больш чым на 6 мільёнаў рублёў. Каб унесці своеасаблівы каларыт, за прылаўкам пакупнікоў сустракалі дзяўчаты, упрыгожаныя асеннімі вянкамі, сімвалізуючымі багацце і шматколернасць гэтай залатой пары года.
Увогуле, святочны настрой прадстаўнікі гандлёвых кропак стараліся стварыць па-свойму. З аднаго грузавіка ўсміхаўся ўкормлены парсючок, на другім красаваліся палявыя кветкі, на трэцім “бабка з дзедам” назіралі за гулам кірмашу.
Найбольшую ўвагу ў гэты дзень прыцягвала кампазіцыя, зробленая рукамі работнікаў гандлю магазінаў № 16 і № 4 КУП “Магазін № 3 г. Нясвіжа”: прыгажуні-“дзяўчаты” віталі ўсіх жытнім караваем. Побач з імі размясціліся сімвалы беларускай гасціннасці – стол, засланы нацыянальным абрусам, з прысмакамі – грыбочкамі і саленнямі, сальцам і цыбулькай. Тут жа, на падворку, ля плеценых з лазы кашоў, напоўненых агароднінай, “бегалі” парасяткі. Гаспадыня кампазіцыі з сярпом у руках, здаецца, толькі што вярнулася з поля.
А недалёка ад хаты і сам “гаспадар” каля возера-люстэрка застыў з вудаю ў руках. Натуральнасць гэтай задумцы надавалі жывыя карасікі, якія плавалі ў пасудзіне побач з ботамі рыбака…
Адзвінеў першы асенні кірмаш. Уладальнікі асабістых гаспадарак запасліся зернем збожжавых культур, а паграбы дбайных гаспадынь напоўніліся гародні-най і бульбай. Садаводы набылі маладыя дрэўцы і кусты для пасадкі, а тыя, хто любіць кветкі, маглі выбраць і насенне, і цыбулінкі, і адразу распушчаныя кусты, напрыклад, хрызантэм. Дзеці пачаставаліся смачнай здобай, дарослыя – гарачым шашлыком.
У наступныя выхадныя – у першую нядзелю кастрычніка – несвіжан і гасцей горада чакае новы асенні кірмаш, у якім прымуць удзел сельскагаспадарчыя і гандлёвыя прадпрыемствы раёна.
Кірмаш пройдзе таксама на прывакзальнай плошчы г.п. Гарадзея.
