Так называлася справаздачная праграма аматарскага калектыву Астроўскага сельскага дома культуры, якая адбылася нядаўна. Канцэрт адлюстраваў шмат вясёлых момантаў з жыцця вяскоўцаў.
Сцэна была аформлена адпаведна: дэкаратыўны плоцік і каларытныя збанкі на ім. Фонам служылі запісы гукаў прыроды: шчабятанне лясных птушак, кукарэканне пеўня, рыканне каровы і г. д. А потым прагучалі лірычныя песні салістаў гуртка індывідуальнага выканання: Святланы Цімафейчык, Марыны Кунік, Алены Ройка і групы “Спатканне”.
Гледачы цёпла ўспрымалі вядомыя і папулярныя творы пра каханне і дружбу, прыгажосць прыроды. У канцэрце прымала ўдзел нямала школьнікаў розных узростаў. Для іх у Доме культуры створаны спецыяльны гурток, дзе юныя артысты вучацца выконваць розныя творы.
Самы юны ўдзельнік гуртка — Паша Кішко. Яго сястра, старша-класніца Ірына, з запалам выканала вясёлую песеньку “Каб не было зімы”. Іх мама Галіна таксама спявае, і такі сямейны тандэм можна толькі вітаць. У калектыве ёсць яшчэ родныя сёстры: Святлана Цімафейчык і Алена Ройка.
Варта адзначыць і тое, што выканаўцы ў розных жанрах стараліся ўнесці элементы тэатральнасці і гумару. Асабліва ўдала атрымалася песня-прыпеўка “Дар’я, душа…” Што датычыць гумару ўвогуле, то астроўцы любяць пажартаваць. Мініяцюры ў выкананні Веры Андрэевай і Святланы Майсейчык выклікалі вясёлае ажыўленне ў зале і смех. Першая артыстка ўдзельнічае ў самадзейнасці больш за дваццаць гадоў, працавала ў школе сакратаром, цяпер на пенсіі і — на сцэне. У яе цудоўна і натуральна атрымліваецца перадаваць настрой сваіх персанажаў, а ўсе міні-гумарэскі ўзяты з жыцця, у тым ліку і мясцовага. Саліст калектыву Сяргей Шарапа прадэманстраваў здольнасці і ў жартоўнай мініяцюры разам з Верай Андрэевай. Усё гэта сведчыць аб тым, што ў Доме культуры вытрымліваюцца розныя напрамкі дзейнасці: вакальны, драматычны, мастацкага слова.
Усю работу ў Астроўскім СДК умела і творча накіроўвае яго загадчык Святлана Майсейчык. Яна скончыла ўніверсітэт культуры і мастацтваў (у той час інстытут) і шмат гадоў працуе ў роднай вёсцы арганізатарам культурных мерапрыемстваў. Сама складае сцэнарыі, піша тэматычныя тэксты на роднай мове, спявае, стараецца, каб яе землякі ахвотна ішлі ў Дом культуры адпачыць душой. І людзі ідуць, бо ведаюць, што будзе цікава і весела, як і на згаданым канцэрце.
Мастацкі кіраўнік раённага цэнтра культуры Ганна Віннічак яго ацаніла на “выдатна”. Яна таксама пажадала далейшых поспехаў выканаўцам. Добрыя словы ў адрас апошніх выказала спецыяліст аддзела ідэалагічнай работы, культуры і па справах моладзі райвыканкама Таццяна Новік, дзякавалі і гледачы.
Напрыканцы гаспадыня ўстановы Святлана Майсейчык запрасіла ўсіх у фае, дзе стаялі сталы з выпечкай і іншымі прысмакамі. Усе жадаючыя змаглі ацаніць майстэрства мясцовых гаспадынь і шчыра дзякавалі за наладжанае свята.
Раіса ХВІР,
г. Нясвіж.