Мінулы год быў насычаным на бібліятэчныя мерапрыемствы розных форм. Цікава прайшла гарадская акцыя “Бібліяноч”, якая па традыцыі збірала ўсіх прыхільнікаў кнігі ў верасні. Дакрануцца да свету літаратуры можна было, пабываўшы на сустрэчы з вядомымі беларускімі пісьменнікамі Тамарай Лісіцкай і Юрыем Паляковым, дэманстравалі эрудыцыю ўдзельнікі ток-шоу “Інтэлект+” і тэлевіктарыны “Чытай кіно”, па просьбах моладзі праходзіла ваенна-тактычная гульня “Лазертаг”.
Стартаваў у мінулым годзе Першы раённы фестываль паэзіі “Голасам свайго пакалення”, прысвечаны паэту-земляку, ветэрану Вялікай Айчыннай вайны, ганароваму грамадзяніну Нясвіжа Паўлюку Пранузу, імя якога носіць бібліятэка.
Распачаў сваю дзейнасць праект “Бібліякроха”, у рамках якога цяпер работа па прагандзе кнігі і чытання вя-дзецца і з выхаванцамі дзіцячых садкоў горада.
Супрацоўнікі бібліятэкі раскрывалі свой творчы патэнцыял у розных конкурсах. Так, у рэспубліканскім конкурсе “Лепшы па прафесіі сярод моладзі, якая працуе ў аграгарадках”, ганаровае другое месца было прысуджана бібліятэкару Аношкаўскай сельскай бібліятэкі Таццяне Гадун (фота 1), а на абласным конкурсе “Бібліятэкар года” другое месца заняла бібліятэкар Ланскай сельскай бібліятэкі Алена Жук (фота 2 — у час Калядных святаў у Нясвіжы). Дарэчы, у мінулым годзе гэтай бібліятэкай праведзена вялікая работа па адра-джэнні беларускага лялечнага тэатра “Ланская батлейка” — яна прадставіла гледачам 12 спектакляў.
У 2016 годзе культурная дзейнасць бібліятэк ахоплівала не толькі свой рэгіён, але і выйшла на міжнародную арэну. Былі падпісаны дамовы аб супрацоўніцтве ў бібліятэчнай сферы з бібліятэкамі трох гарадоў-партнёраў Нясвіжа: г. Пулавы (Польшча), г. Радвілішкіс (Літва) і г. Ауцэ (Латвія).
Працягвалася работа на ніве духоўнай асветы. Так, у рамках дзейнасці духоўна-асветніцкага цэнтра “Існасць” пры бібліятэцы былі створаны Нядзельная школа для дарослых і Школа праваслаўнага выхавання. А па выніках работы за 2016 год у гэтым накірунку бібліятэка была ўзнагароджана Епархіяльнай Граматай епіскапа Слуцкага і Салігорскага.
Гэтыя і многія іншыя дасягненні ў многім залежаць ад прафесіяналізму, мэтанакіраванасці і працаздольнасці ўсяго калектыву супрацоўнікаў. Граматныя спецыялісты, умелыя арганізатары і прапагандысты кнігі, энтузіясты сваёй справы, яны знаходзяцца ў пастаянным творчым пошуку.
Менавіта да такіх належаць высокакласныя прадстаўнікі бібліятэчнай сферы раёна — намеснік дырэктара цэнтральнай раённай бібліятэкі А.А. Кульбей, загадчыкі аддзелаў — З.А. Сілкова, А.В.Чухлей, К.В. Дубовік, Н.А. Сідорка, метадыст Ю.А. Карпач, бібліятэкар В.В. Шчарбакова.
Шчодра дзеляцца сваімі ведамі і вопытам з маладымі калегамі, вучаць думаць і дзейнічаць прафесійна, шукаць нетрадыцыйныя падыходы да работы вопытныя спецыялісты Н.А. Богдан, В.М. Гуцько, Л.М. Нядзілька, З.П. Грабёнка, А.А. Міклашэвіч, Л.К. Гуленка, А.М. Верамчук.
З веданнем справы дапамагаюць чытачам арыентавацца ў бяскрайнім кніжным моры А.Л. Кунаш, А.І. Кандратовіч.
Людміла ВІТКО,
дырэктар Нясвіжскай цэнтральнай раённай
бібліятэкі імя Паўлюка Пранузы.
Фота Іны ВАСІЛЕВІЧ і Святланы ПОЛЬСКАЙ.