Нясвіжскія навіны 
Ужо шмат гадоў радуе вока прахожых дом №132 па вуліцы Школьнай у аграгарадку Ударны. Тут жывуць пераможцы раённага конкурсу на лепшую сядзібу па Гарадзейскім сельскім Савеце за 2016 год Юрый Антонавіч і Людміла Сяргееўна Мікалайчык. Гаспадар працуе галоўным механікам у ТАА “Вуддорс”, а гаспадыня — лабарантам цеплаэлектрацэнтралі на Гарадзейскім цукровым камбінаце.
У сваім доме яны жывуць больш за 20 гадоў і за гэты час зрабілі шмат, каб іх сямейнае гняздо стала як мага больш прывабным і ўтульным.
— Ідэі па ўпрыгажэнні ўчастка прыходзяць адусюль,— расказаў у нашай гутарцы Юрый Антонавіч. — Разам выбіраем, абмяркоўваем.
А Людміла Сяргееўна дадала, што без працавітых рук мужа дагледзець усё як след і стварыць нешта новае было б немагчыма. Ён дапамагае ў падтрыманні парадку на газоне, ва ўладкаванні клумбаў (сёлета, напрыклад, дапамог зрабіць новую, з камянёў), ва ўсіх іншых работах, дзе патрэбна мужчынская сіла. Летам на ўчастку Мікалайчыкаў з’яўляецца часовы басейн, заўсёды стаяць арэлі, дзе можна адпачыць сям’ёй пасля працы, а гасцей дома сустракаюць лялечныя дзядуля з бабуляй — прыветлівыя, нібы жывыя. І гэта не выпадковае ўражанне — фігуркі зроблены гаспадыняй ўласнаручна са старых панчох і сінцепона, на іх надзета сапраўднае адзенне і сапраўдны абутак.
На выхадных да агульнай справы далучаюцца сын і дачка, калі прыязджаюць з Мінска. Па магчымасці, дапамагаюць бацькам наводзіць прыгажосць у роднай мясцінцы.
Увогуле, у кожную з 15 сотак участка тут укладзена шмат фантазіі, шмат душы і, вядома ж, працы. Адных толькі любімых кветак гаспадыні — руж — тут 70 кустоў! А калі дадаць да іх яшчэ рознакаляровыя пера-лівы цюльпанаў, петуній, півонь, гваздзікоў, цыній і многіх іншых кветак, кожная з якіх цвіце ў свой час і стварае кветкавы дыван ад ранняй вясны да позняй восені, то становіцца зразумелым, чаму ад сядзібы Мікалайчыкаў так доўга не хочацца адводзіць позірк, радуючыся выніку працы добрых гаспадароў.
Усё жыццё працуюць у СВК “Гарадзея” Віктар Цімафеевіч і Алена Вячаславаўна Жодзік, гаспадары дома №25 па вуліцы Цэнтральнай у вёсцы Новая Лысіца, які заняў другое месца ў раённым конкурсе на лепшую сядзібу па Гарадзейскім сельскім Савеце за 2016 год.
Як расказала ў нашай гутарцы Алена Вячаславаўна, у сваім доме яны жывуць параўнальна нядаўна — 8 гадоў, але за гэты час пастара-ліся добраўпарадкаваць свой немаленькі участак (а гэта 40 сотак) найлепшым чынам, адну палову адвёўшы на кветкі, дрэвы і газон, а другую — на агарод. Да працы на зямлі прывучаны і іх дзеці — ужо дарослыя Андрэй і Марыя і маленькі Саша, якому зараз ідзе пяты гадок. У Андрэя ўжо ёсць свая сям’я, і Алена Вячаславаўна з задавальненнем дзеліцца сваімі кветкамі з нявесткай, якая таксама вельмі іх любіць. А Саша ўжо праяўляе сябе як выдатны мамін памочнік і будучы ландшафтны дызайнер: палівае кветкі і падкорм-лівае іх так, як скажа і пакажа мама, а самае галоўнае — падае ідэі, як што зрабіць, напрыклад, уладкаваць клумбу ў выглядзе сонейка, бо на ёй так будуць лепш глядзе-цца жоўтыя кветачкі.
— Мне так падабаецца, калі кветачка ўсміхаецца! А як пахне! — гаворыць маме маленькі садавод і яшчэ больш стараецца парадаваць сваіх зялёных сябровак, а яны адказваюць яму за клопат пышным цвіценнем і цудоўным водарам. Алена Вячаславаўна, дарэчы, вельмі любіць духмяныя кветкі, асабліва лілеі, і іх вельмі шмат на яе ўчастку.
— Кожная кветка прыгожая па-свойму, — гаворыць яна. — Клематысы, астры, флёксы, лаватэра — усяго і не пералічыш, што ў нас расце. І мы іх любім усе, усімі захапляемся.
Увогуле галоўны прынцып гэтай дружнай сям’і — адзінства і ўзаемадапамога. Віктар Цімафеевіч сваімі рукамі з фанеры і выкарыстаных шын робіць фігуркі, якія ўпрыгожваюць участак, Алена Вячаславаўна “загадвае” кветкамі, а полюць клумбы і агарод усе разам.
— Я вельмі люблю працаваць на зямлі, — сказала ў завяршэнне нашай гутаркі мая суразмоўца. — Люблю сваю гаспадарку, сваю вёску, свае кветкі. А як пяюць салаўі, калі а палове пятай едзеш на ферму! Гэту цішыню і прыгажосць нічым нельга замяніць. І так хочацца, каб родная зямля была самай цудоўнай, самай прыгожай!
Да гэтага жадання, напэўна, далучаецца кожны з нас. І кожны можа пачаць з сябе — са свайго дома, свайго ўчастка, які можа быць такім жа прыгожым, як і ў сям’і Жодзік з Новай Лысіцы.
Яшчэ адзін яскравы прыклад вернасці роднаму кутку — сям’я Уладзіміра Вікенцьевіча і Валянціны Фёдараўны Абрамовіч, што жывуць у вёсцы Макашы па вуліцы Цэнтральнай, 13. Іх дому і ўчастку было прысуджана трэцяе месца ў раённым конкурсе на лепшую сядзібу па Гарадзейскім сельскім Савеце за 2016 год. Паважаныя гаспадары ўжо колькі гадоў знаходзяцца на заслужаным адпачынку. Уладзімір Вікенцьевіч быў у мясцовай гаспадарцы вадзіцелем, а Валянціна Фёдараўна, прыехаўшы ў 1968 годзе на Янчыцкі ФАП маладым спецыялістам, так і адпрацавала там фельчарам. Сёлета 49 гадоў, як яны разам, і ўвесь гэты час так і жывуць у хаце, дзе нарадзіўся і вырас сам гаспадар, і якая стала роднай і для яго жонкі. Гэтыя сціплыя шчырыя людзі выгадавалі дзвюх дачок, якія падарылі ім чатырох унукаў, а тыя, у сваю чаргу, ужо і аднаго праўнучка.
Нягледзячы на паважаны ўзрост, Уладзімір Вікенцьевіч і Валянціна Фёдараўна даглядаюць свой дом і ўчастак найлепшым чынам: чысцюткі агарод, россыпы руж, лілей, касачоў, гваздзікоў, астраў і іншых шматгадовых і аднагадовых кветак пастаянна ўпрыгожваюць іх падворак. А з зеляніны выглядваюць садовыя скульптуры — і куплёныя, і створаныя рукамі гаспадара: лебедзі з пластыкавых бутэлек, карзіны з лазы пад кветкі.
Усё цудоўна атрымліваецца ў гэтых добрых людзей, нават экзатычныя кавуны растуць у адкрытым грунце і вырастаюць да 8 — 10 кілаграмаў на радасць і гаспадарам, і іх гасцям.
— Люблю, каб на агародзе не было лішняй зялінкі, — гаворыць з усмешкай Валянціна Фёдараўна. — Вось так паціху і корпаюся — то там прыбрала, то там падчысціла, дзе трэба, гаспадар дапаможа, глядзіш, усё і зладзілася. А сіл, як кажуць, родныя сцены дадаюць.
І з гэтым не паспрачаешся — сіл паважаным прызёрам раённага конкурсу яшчэ трэба шмат: наперадзе — 50-годдзе сумеснага жыцця і 80-гадовы юбілей Уладзіміра Вікенцьевіча. Дай Бог, як кажуць, за год прычакаць!
Соф’я ЛЮБАНЕЦ
Фотаздымкі прадастаўлены аддзелам архітэктуры і будаўніцтва райвыканкама
