Нясвіжскія навіны Інвалід Вялікай Айчыннай вайны Міхаіл Якаўлевіч Герман нарадзіўся ў студзені 1923 г. у вёсцы Нялепава, дзе жыве і зараз.
Як і большасць вяскоўцаў у той час, працаваў на асабістай гаспадарцы, з дзяцінства дапамагаў бацькам, асвойваючы азы сялянскай мудрасці.
Міхаіл Якаўлевіч Герман
Мірнае жыццё перарвала вайна. Акупацыя, затым вызваленне, і ў жніўні 1944 года — мабілізацыя на фронт. Быў тады маладому чалавеку 21 год. Ваяваць давялося ў 284-м стралковым палку ІІ-га Беларускага фронта ў якасці стралка-кулямётчыка.
Па ўласным прызнанні ветэрана, самым незабыўным эпізодам вайны стала для яго фарсіраванне ракі Нарвы ў Польшчы ў студзені 1945-га, якое ледзь не каштавала яму жыцця. Баі тады былі вельмі цяжкія, загінулі многія аднапалчане. Сам Міхаіл Якаўлевіч быў ранены ў руку і нагу, да вечара праляжаў каля лесу, але, калі падбіралі забітых, яго знайшлі і адправілі ў шпіталь. Ён быў так перапоўнены раненымі, што ляжаць давялося з таварышам на адным ложку па чарзе, бо месц не хапала.
Аднак галоўнае, што пашчасціла дачакацца перамогі. З арміі салдат быў звольнены 23 мая 1945 года па раненні.
Зараз пра яго баявую маладосць нагадваюць ваенныя ўзнагароды: ордэн Вялікай айчыннай вайны 1-й ступені, медалі “За адвагу”, “За баявыя заслугі”, “За перамогу над Германіяй у Вялікай Айчыннай вайне 1941 — 1945 гг.”
Соф’я ЛЮБАНЕЦ.
