Нясвіжскія навіны Году малой радзімы і 75-годдзю вызвалення Беларусі ад фашысцкіх захопнікаў быў прысвечаны сёлета Нацыянальны фестываль беларускай песні і паэзіі “Маладзечна-2019”. У яго рамках прайшоў VII абласны фестываль сямейнай творчасці “У добрым родзе ўсе ў згодзе”. На яго з Нясвіжчыны былі запрошаны тры сям’і. Несвіжане Тамара і Уладзімір Прыгун пакарылі сэрцы слухачоў сваімі песнямі. Народны майстар Беларусі, жыхарка вёскі Слаўкава Алена Хоміч з нявесткай Ірынай дэманстравалі на выставе прадметы, вырабленыя іх залатымі рукамі: тэкстыльныя лялькі, рэчы, сплеценыя з саломкі, тканыя паясы, лапікавае шыццё, вырабы з фаамірану. Выклікалі таксама захапленне вышытыя бісерам іконы, кветкі і ўпрыгажэнні з фаамірану, вырабы з бісеру Святланы Мартос, яе мужа Станіслава і ўнучкі Марыі з пасёлка Новагарадзейскі. Удзельнікі фестывалю вярнуліся дамоў з дыпломамі і каштоўнымі падарункамі.
Цяпер творчыя людзі нашага раёна рыхтуюцца да новай паездкі. На гэты раз — у Мінск, каб 23 чэрвеня аздобіць сваім талентам і творчасцю адзін з дзён ІІ Еўрапейскіх гульняў.
Тамара ПРАЛЬ-ГУЛЬ.
