Спасцігаць загадку слова. У Нясвіжы прайшоў Міжнародны дзень роднай мовы

Поделитесь с друзьями
  •  
  •  
  •  
  •  
  •  
  •  

Штогод 21 лютага адзначаецца Міжнародны дзень роднай мовы. Гэта дзень, калі кожны народ, кожная нацыя нагадвае, што няма народа без мовы. Роднае слова з’яўляецца адным з самых вялікіх здабыткаў кожнага народа, бо яно — люстэрка культуры, духоўнае аблічча і сутнасць чалавека. А для нас беларуская мова — гэта мова нашай Радзімы, у якой “усё мілагучна для слыху майго: і звонкае “дзе” і густое “чаго”. Нам у спадчыну дасталася ўнікальная мова — прыгожая і непаўторная, мілагучная і пяшчотная, а наша задача заключаецца ў тым, каб яе захаваць, перадаць нашчадкам.

З мэтай выхавання нацыянальнай свядомасці, любові да Радзімы, да культурнай спадчыны, у Лысіцкім НПК д/с-СШ прайшлі мерапрыемствы, прымеркаваныя да гэтага свята, пад дэвізам: “Рускай мове дай разгрузку — размаўляй па-беларуску”. Стварэнню святочнага настрою спрыяла мастацкае афармленне школы, арганізаванае настаўніцай беларускай мовы і літаратуры Н.І. Гурынай, якое пачалося ў 8 гадзін раніцы. Вучаніцы 6 класа М. Чухлей і В. Чухлей у нацыянальных беларускіх касцюмах сустракалі вучняў і настаўнікаў школы каля ўваходу, уручалі эмблемы свята з выявай беларускага сімвала — бусла.

На кожным перапынку настаўніца беларускай мовы і літаратуры І.В. Мышкавец арганізоўвала вясёлыя акцыі “Размаўляем па-беларуску”, мэтай якіх стала ўвесці вучняў у атмасферу жывога беларускага слова, даць адчуць яго прыгажосць, непаўторнасць і мілагучнасць.

Для вучняў 4 — 8 класаў быў праведзены квэст “З рога ўсяго многа”, падчас якога вучні разгадвалі крыжаванкі, загадкі, рыфмавалі словы, успаміналі беларускія прыказкі і прымаўкі, былі перакладчыкамі.

Вучні старэйшых класаў далучыліся да агульнанацыянальнай акцыі: пісалі дыктоўку “Беларусь помніць”, прысвечаную 75-годдзю вызвалення Радзімы ад нямецка-фашысцкіх захопнікаў.

Настрой святу задаў конкурс на лепшага знаўцу беларускіх песень і гуртоў, у ходзе якога можна было паслухаць беларускія мелодыі і праверыць свой інтэлектуальны ўзровень у галіне беларускай музыкі.

Сумесна з загадчыкам Лысіцкага клуба-бібліятэкі В.А. Пастуховіч настаўніцай беларускай мовы і літаратуры І.В. Мышкавец было праведзена мерапрыемства “Беларусь мая сінявокая”, дзе вучні чыталі вершы на роднай мове, спявалі песні. Цікавай і запамінальнай стала ў час свята сустрэча з мясцовымі паэткамі Л.А. Бука і Г.У. Дземідовіч, якія прыгожа чыталі свае вершы на роднай мове пра нашу вёску, яе людзей. Задушэўныя і шчырыя словы паэтак пакінулі самыя лепшыя ўражанні і сведчанне таго, што ёсць і ў нашай вёсцы людзі, якія з пяшчотай размаўляюць, пішуць на роднай мове, клапоцяцца, каб мова наша была і заўтра, і паслязаўтра неабходнай нам, беларусам.

З нагоды свята ў фае школы настаўніца Н.І. Гурына арганізавала выставу газет, малюнкаў пра родную мову і родную старонку “Скарбонка роднага слова”.

У святочны дзень прайшоў цікава і запамінальна. І мы спадзяёмся, што ў сэрцы кожнага вучня нашай школы абудзілася любоў да роднага слова, адказнасць за сваю Радзіму.

Ірына Мышкавец,

настаўнік беларускай мовы

і літаратуры ДУА “Лысіцкі НПК дзіцячы сад- сярэдняя школа”.


Поделитесь с друзьями
  •  
  •  
  •  
  •  
  •  
  •  

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.