Нясвіжскія навіны
Пяты абласны конкурс “Смак” кухараў дамоў-інтэрнатаў і аддзяленняў кругласутачнага прабывання тэрытарыяльных цэнтраў сацыяльнага абслугоўвання насельніцтва прайшоў на базе Капыльскага раёна. Конкурс меў два этапы. На першым удзельнікі прадстаўлялі гатовыя вырабы з мяса, рыбы, выпечку і дэсерты. На другім — за паўгадзіны рыхтавалі халодныя закускі.
Кухар Нясвіжскага дома-інтэрната для састарэлых і інвалідаў Наталля Бобрык стала пераможцам у намінацыі “Лепшая рыбная страва”. Сёння мы прапануем нашым чытачам яе рэцэпт.
“Марское царства”
Інгрэдыенты:
шчупак — 1 шт., цыбуліна — 1 шт., морква — 1 шт., жэлацін — 2 пачкі па 50 г, яйка — 1 шт., соль, прыправа — па смаку.
Ачысціць рыбу ад лускі, выдаліць плаўнікі, галаву і вантробы. Акуратна зняць шкурку разам з хвастом. Выбраць з філе усе костачкі і прапусціць праз мясарубку. Цыбулю і моркву падсмажыць, таксама прапусціць праз мясарубку. Злучыць з рыбным фаршам, дадаць яйка, прыправу і соль, перамяшаць. Нафаршыраваць шкурку і запякаць у духоўцы 30 — 40 хвілін пры 150 градусах.
Адварыць галаву рыбы, булён злучыць з жэлацінам, разведзеным у вадзе. Заліць ім ахалоджаную фаршыраваную рыбу і паставіць у халоднае месца на тры гадзіны.
“НН”.
