Азімыя пшаніца і трыцікале ў ААТ “Нясвіжскія Астроўкі” будуць пасеяны сёлета на плошчы 760 гектараў. Хутка пачнецца падрыхтоўка глебы да гэтай адказнай кампаніі. А пакуль што механізатар Юрый Манулік на трактары МТЗ-3052 узараў у Прасцях 50-гектарнае поле пад азімую свірэпіцу, вядзе ворыва ў Новінах пад азімы рапс. Ён таксама зойме 50 га. Кожны дзень механізатар заносіць на свой рахунак 20 — 22 гектары глебы. Пойдуць алейныя культуры пасля ячменю, які своечасова зжалі камбайнеры гаспадаркі. Салому сцюкавалі Віталь Манулік і Мікалай Пяшко. А механізатар Аляксей Гурын унёс фосфарныя і калійныя ўгнаенні.
Пад гэтыя азімыя культуры арэ зараз глебу пасля ўборкі яравых і механізатар ААТ “Сейлавічы” Анатоль Навоша. На трактары МТЗ-3022 яго дзённая выпрацоўка дасягае 25 гектараў.
Азімая свірэпіца ў гэтай гаспадарцы размесціцца на 100 гектарах, азімы рапс — на 150 га.
Тамара ПРАЛЬ-ГУЛЬ.