У доследную навуковую станцыю па цукровых бураках Аляксей Раўгейша прыйшоў сем гадоў таму трактарыстам-машыністам. Зарэкамендаваў тут сябе з лепшага боку. Усе даручаныя заданні выконвае добрасумленна і якасна, карыстаецца аўтарытэтам у калектыве. За сваю стараннасць і адданасць прафесіі неаднаразова атрымліваў узнагароды.
Веснавы сезон Аляксей Іванавіч пачынае з падкормкі азімых культур КАСам. Пазней займаецца аховай пасеваў цукровых буракоў ад пустазелля, хвароб. Праводзіць двухразовую пазакаранёвую падкормку раслін. А падчас уборкі збожжавых культур садзіцца за штурвал камбайна “Ліда-1300”.
— Што ні даручаць, за ўсё бяруся, — гаворыць Аляксей Іванавіч. — На ўборцы вельмі падабаецца. І ўвогуле я люблю працаваць.
Пасля цяжкіх працоўных будняў дома мужа і тату чакаюць жонка Наталя Анатольеўна і дачушкі — шасцікласніца Лерачка і перша-класніца Міланка. А ў выхадныя дні працавітыя рукі рупліўца Аляксея Іванавіча знаходзяць сабе прымяненне ў вёсцы ў бацькоў. Там і па-працаваць трэба, і адпачыць на свежым паветры можна, набрацца новых сіл надалей.
Вольга КАНДРУКЕВІЧ.
Фота Наталлі ЕРМАШЭНКА.