Нясвіжскія навіны Па існуючай традыцыі напярэдадні Новага года прадстаўнікі раённай улады і іншыя адказныя асобы наведваюць дзіцячыя дамы сямейнага тыпу раёна. На гэты раз адзін з такіх дамоў наведалі прадстаўнікі аддзела адукацыі, спорту і турызму райвыканкама — начальнік А.У. Клішэвіч і яе намеснік С.А. Шатрун разам з галоўнымі героямі навагодніх свят Дзедам Марозам і Снягуркай і іншымі казачнымі персанажамі. Яны накіраваліся ў сям’ю Ігара Вітальевіча і Галіны Леанідаўны Бушмакіных, дзе зараз выхоўваюцца шасцёра дзяцей ад двух да шаснаццаці гадоў і адно знаходзіцца на патранатным выхаванні.
Ва ўтульнай зале адбылося невялікае святочнае дзейства. Дзеці чакалі Дзеда Мароза і з гэтай нагоды падрыхтавалі навагоднія касцюмы, музычныя нумары, вывучылі вершы, чым вельмі парадавалі гасцей. Разам вадзілі карагоды вакол ёлкі, удзельнічалі ў конкурсах. Дзед Мароз падзякаваў юным артыстам за цікавае выступленне, пажадаў старанна вучыцца ў школе, выдатнага настрою і ўсяго самага найлепшага ў жыцці.
Словы віншавання выказалі і Алена Клішэвіч і Святлана Шатрун, якія пажадалі здароўя гаспадарам і іх выхаванцам, шчасця, радасці і дабрабыту. Ад імя раённага выканаўчага камітэта яны падаравалі сям’і тэлевізар і салодкія падарункі, салодкія падарункі дзеці атрымалі таксама ад райкама прафсаюза работнікаў адукацыі і навукі, ад раённага савета Беларускай рэспубліканскай піянерскай арганізацыі.
І дзеці, і бацькі былі вельмі ўдзячныя гасцям за падарункі, хвіліны радасці і святочны настрой.
Галіна Леанідаўна выказала словы падзякі за ўвагу і клопат з боку раённай улады, за дапамогу ў аднаўленні дома: за кошт сродкаў раённага бюджэту поўнасцю праведзены рамонт фасада, заменены дах, добраўпарадкавана тэрыторыя, пастаўлены новы плот, закуплена новая мэбля ў пакоі.
Вольга КАНДРУКЕВІЧ.
