Нясвіжскія навіны У раёне зараз, згодна з пастановай № 630 Савета Міністраў Рэспублікі Беларусь, праходзіць дзяржаўны тэхнічны агляд трактараў, прычэпаў, паўпрычэпаў і пагрузчыкаў.
Арганізаваны ён па графіку, зацверджаным рашэннем № 1938 Нясвіжскага райвыканкама ад 26 снежня 2017 года. Ён быў разасланы ва ўсе прадпрыемствы, арганізацыі, дзе ёсць такая тэхніка. Дарэчы, гэты графік быў апублікаваны ў нашай газеце 21 лютага.
Як ідзе праверка, як да яе падрыхтаваліся адказныя асобы, мы папрасілі расказаць галоўнага дзяржаўнага інжынера-інспектара дзяржтэхнагляду раёна — начальніка раённай інспекцыі дзяржтэхнагляду Пятра СЕЎРУКА.
— Пётр Юр’евіч, тэхнічны агляд пачаўся з канца лютага. Тэрміны звязаны з хуткім выхадам у поле працаўнікоў сельгаспрад-прыемстваў?
— Гэта штогадовы дзяржаўны тэхагляд. Проста ў сакавіку ўсю ўвагу ўдзяляем сельскай гаспадарцы. А вось калі разгорнуцца вясновыя палявыя работы, прыступім да праверкі іншых прадпрыемстваў і арганізацый. Такім чынам і графік складзены. Выязджаем на месца і акрамя графіка, датэрмінова, па заяўках сельгаспрад-прыемстваў. Зразумела, што адначасова ўсе трактары на тэхагляд не паставіш — вялікая іх колькасць занята на кармленні жывёлы. Даводзіцца правяраць па частках. Па стане на 19 сакавіка ў 10-і гаспадарках агляд прайшоў па графіку, у пяці — па-за графікам. На гэту дату на тэхагляд было прадастаўлена 84 % трактараў, з іх прайшло агляд 91 %; прычэпаў — адпаведна 67 і 66 %, што некалькі горш.
— Хто, акрамя вас, уваходзіць у склад камісіі?
— Прадстаўнікі зацікаўленых службаў — супрацоўнікі ўпраўлення сельскай гаспадаркі і харчавання райвыканкама, АДАІ Нясвіж-скага РАУС, райваенкамата, ААТ “Нясвіжскі райаграсэрвіс”.
— На якія аспекты звяртаеце асаблівую ўвагу?
— Правяраем тармазную сістэму, асвятляльную сігналізацыю, а таксама — ці праводзілася своечасова тэхнічнае абслугоўванне рухавіка (замена масла, рэгуліроўка клапанаў), замена масла ў каробцы перадач, трансмісіі. У энерганасычаных трактарах камп’ютар пакажа, ці мелі месца даныя “маніпуляцыі”, у астатніх — правяраем па дакументах. Тэхніка каштуе дорага. І калі своечасова не правесці тэхабслугоўвання, потым на рамонт давядзецца затраціць немалыя грошы. Знешні выгляд таксама павінен быць належным.
— І якія вашы ўражанні? Што паказвае праверка?
— Адны з лепшых на сёння — ААТ “Нясвіжскія Астроўкі” і ЗАТ “1 Мая”. У першай гаспадарцы кожны год адказна рыхтуюцца да гэтага мерапрыемства. У другой — сітуацыя палепшылася ў разы з прыходам новага галоўнага інжынера. Да дня праходжання тэхагляду (1 сакавіка) у іх было гатова 95 % трактараў. Гэта добры паказчык. Па-за графікам нядрэнна падрыхтаваліся ў ААТ “Гарадзея”. Трэба адзначыць СВК “Агракамбінат Сноў” і ААТ “Новае жыццё”. Па гэтых гаспадарках заўваг, можна сказаць, няма. Па астатніх — ёсць. Недахопы ім даводзіцца ліквідоўваць. Дробныя — на працягу дня, адначасова з работай камісіі. Калі ёсць сур’ёзныя, даём прадпісанне, указваем новы тэрмін правядзення тэхагляду.
Спраўная тэхніка — гэта і своечасова выкананая работа, ад чаго залежыць у пэўнай ступені ўраджай і надой малака, і захаванне тэхнікі бяспекі, і эканомія сродкаў, аб чым я гаварыў вышэй.
— Які аб’ём работы вашай камісіі трэба выканаць?
— Нам трэба агледзець 632 трактары, з іх 62 — энерганасычаныя (гэта значыць, магутнасцю 250 конскіх сіл і болей), 437 прычэпаў, 108 пагрузчыкаў.
З 10 да 15 мая правядзём тэхагляд кормаўборачнай тэхнікі, з 1 да 10 ліпеня — збожжаўборачнай.
— Ці папоўніўся трактарны парк раёна напярэдадні вясновай пасяўной кампаніі новай тэхнікай?
— Так. Новыя трактары купілі ААТ “Гарадзея” — энерганасычаны “Беларус 3522” і два — маркі “Беларус 1523”. “Нясвіжскія Астроўкі” набылі адзін “Беларус 1523”. Будуць і далейшыя паступленні.
Гутарыла Тамара ПРАЛЬ-ГУЛЬ.
