Нясвіжскія навіны У аўторак, 12 сакавіка, у Нясвіжы пройдуць мерапрыемствы, прысвечаныя 110-годдзю з дня нараджэння ганаровага грамадзяніна Нясвіжа, былога пробашча касцёла Божага Цела, ксяндза-прэлата Гжэгажа Каласоўскага.
У 17.15 адбудзецца ўскладанне кветак да яго магілы на гарадскіх могілках, а таксама да магілы ганаровага грамадзяніна Нясвіжа, мітрафорнага протаіерэя, настаяцеля Свята-Георгіеўскага храма г. Нясвіжа Дзмітрыя Хмеля, які шмат гадоў быў верным сябрам ксяндза Каласоўскага. У іх памяць будуць узнесены малітвы.
У 18.00 пачнецца святая імша ў касцёле Божага Цела.
У 19.00 у кінатэатры “Салют” будзе паказаны дакументальны фільм аб гісторыі Нясвіжа, у якім прагучыць апошняе інтэрв’ю святара, пасля чаго адбудзецца вечар, прысвечаны яго памяці.
Усе мерапрыемствы можа наведаць кожны, каму дарагая памяць аб гэтым выдатным чалавеку, што выратаваў ад разбурэння гістарычны храм, у якім служыў, і клапаціўся яшчэ пра дзесяць з лішкам прыходаў, дзе шмат гадоў не было святароў.
“НН”.
