Нясвіжскія навіны Аднаўляльныя лясныя рэсурсы ў Беларусі павінны выкарыстоўвацца з максімальным эфектам. На гэта звярнуў увагу Прэзідэнт Беларусі Аляксандр Лукашэнка, заслухоўваючы даклад па развіцці дрэваапрацоўчай і цэлюлозна-папяровай прамысловасці.
Кіраўнік дзяржавы адзначыў, што гэта галіна з’яўляецца важнейшай і стратэгічнай для эканомікі. У гэту сферу накіраваны немалыя фінансавыя рэсурсы, заўважыў ён.
“І трэба адзначыць, укладзеныя сродкі сябе апраўдваюць, — заявіў кіраўнік дзяржавы. — Захаваны працоўныя калектывы на прадпрыемствах, якія без мадэрнізацыі сёння проста ўжо не існавалі б. Створаны тысячы новых працоўных месцаў, у некалькі разоў павялічаны аб’ёмы перапрацоўкі драўніны і экспарту прадукцыі з высокай дабаўленай вартасцю.
Найбольш праблемныя інвестыцыйныя праекты былі разгледжаны на прэзідэнцкай нарадзе ў канцы 2019 года: гэта заводы па вытворчасці паперы-асновы ў Шклове, мелаванага і немелаванага кардону ў Добрушы і сульфатнай беленай цэлюлозы ў Светлагорску.
Мадэрнізацыя плітных заводаў дала магчымасць уключыць у абарот нізкасортную драўніну. Агульны аб’ём яе спажывання ў бягучым годзе складзе 5,2 млн куб.м, а да 2025 года толькі дзякуючы стварэнню перапрацоўчых біяэнергетычных вытворчасцей паліўных пелет будзе ўключана дадаткова 2,8 млн куб.м драўніны ліставых парод.
На прадпрыемствах канцэрна “Беллеспаперапрам” ажыццяўляецца глыбокая перапрацоўка драўніны, з яе атрымліваюць прадукцыю з высокай дабаўленай вартасцю, з якой больш як 70 працэнтаў пастаўляецца на знешнія рынкі. Са студзеня па жнівень на экспарт пастаўлена прадукцыі на $377,9 млн.
Па інфармацыі БелТА.
