Вялікае задавальненне я атрымала, калі выпадкова апынулася на свяце Масленіцы, што праходзіла ў сакавіку каля РЦК, і міжволі стала яго ўдзельніцай.
Прыемна хваляваліся самадзейныя артысты. І калі сонца схавалася на некаторы час і на вуліцы спахмурнела, іх занепакоенасць стала яшчэ большай, бо яны рыхтаваліся і моцна хацелі падарыць людзям свята ажыўлення прыроды, абнаўлення, навізны і шчасця вясны 2021 года. І раптам засвяціла сонца, скончыўся кароткі сыпучы дождж і ўсё атрымалася.
Яны змаглі прынесці прыўзняты настрой і радасць усім, хто прыйшоў ушанаваць вясну і адчуць яскрава гэта натхненне, якое так і вырывалася з грудзей і сэрцаў артыстаў. Ім можна было хіба толькі пазайздросціць, колькі яны выпраменьвалі шчырасці, бадзёрасці і яскравай энергіі, якую яны прывезлі з сабой са сваіх вёсак, пасёлкаў і аграгарадкоў.
Ім трэба аддаць даніну павагі і быць удзячнымі за тое, што яны прынеслі сваю шчырасць і весялосць, здаровы запал, каб падараваць усё гэта нам. Асабліва вылучаўся сярод удзельнікаў карагода самадзейны артыст з Завітанскага клуба-бібліятэкі, самы ўзроставы ўдзельнік ансамбля песні “Рэха”, Міхаіл Карпач. За гэта хачу выказаць яму асаблівую падзяку, таму што ён паказаў сваім прыкладам, як гэта ладна і прыгожа — дараваць добры настрой людзям, што прыйшлі адзначыць свята, якое бывае толькі раз у год пад назвай Масленіца. Свята вясны, свята, якое дае надзею людзям на новае абуджэнне прыроды, на поспех і дабрабыт.
Дзякуй творчым калектывам раёна і аддзелу ідэалагічнай работы, культуры і па справах моладзі райвыканкама, якія шчыра адкрылі дзверы і запрасілі з добрым настроем і вялікай павагай да нас Вясну-2021.
Дзякуй, што ёсць такія самародкі, якія аддана служаць “яе Вялікасці Культуры”.
Ганна КОРСАК,
пенсіянерка, г. Нясвіж.