Нясвіжскія навіны Сёння дзяцей, якія гэтымі перадсвяточнымі днямі знаходзяцца ў дзіцячым аддзяленні Нясвіжскай цэнтральнай раённай бальніцы, павіншавалі з надыходзячым Новым годам старшыня Нясвіжскага райвыканкама Аляксандр Ломскі, першы сакратар РК ГА “БРСМ” Кацярына Іюльская, галоўны ўрач УАЗ “Нясвіжская ЦРБ” Вікторыя Пражэнік і прадстаўнікі Мінскага абласнога аддзялення РГА “Беларускі дзіцячы фонд”. Госці аддзялення падарылі маленькім пацыентам прыемныя падарункі.
Таксама старшыня раённай вертыкалі ўлады Аляксандр Ломскі ўручыў педыятрычнаму аддзяленню ў асобе яго загадчыка ўрача-неанатолага Святланы Грыцэнка халадзільнік для ўмацавання матэрыяльна-тэхнічнай базы раённай бальніцы.
Забаўляльнай праграмай парадавалі маленькіх пацыентаў ЦРБ супрацоўнікі гарадскога маладзёжнага цэнтра. Так, дзетак са святам павіншавалі не толькі Дзед Мароз і Снягурка, але і бліскучая Ёлачка і жвавая Панда.
Дарослыя зрабілі ўсё магчымае, каб дзеці, якія знаходзяцца на лячэнні ў стацыянары, забыліся пра нягоды і акунуліся ў свет свята і чараўніцтва.
