На мінулым тыдні ў раённым цэнтры культуры ўпершыню прайшоў “Дамскі вечар” — мерапрыемства, якое ставіла сваёй мэтай не толькі сабраць пад адным дахам аматараў культурнага адпачынку ў святочных
уборах (жанчыны павінны былі быць у вячэрніх сукенках, а мужчыны — у класічных касцюмах), але і стварыць рэкламу новай — Белай зале РЦК.

Вядучыя “Дамскага вечара” Кацярына Шустал, Караліна Гарашчэня і Сяргей Калеснікаў

Пасля адмысловага рамонту яна набыла сапраўды святочны, вельмі ўрачысты воблік і плануецца для выкарыстоўвання не толькі як зала для заключэння шлюбаў, але і як памяшканне для правядзення іншых урачыстых мерапрыемстваў культурнага плану.

Фрагмент афармлення столікаў для гасцей

Як патлумачыла дырэктар Нясвіжскага РЦК Ганна Віннічак, “Дамскі вечар” стаў цудоўнай нагодай для людзей, якія хочуць правесці час у прыгожай абстаноўцы пад добрую музыку, сустрэцца і пагутарыць з сябрамі ў нефармальных умовах, з фуршэтам. Жадаючыя маглі фатаграфавацца на памяць у фотазоне, а таксама палюбавацца на выставу мастацкіх фатаграфій, прысвечаную жаночай прыгажосці. Каб прысутныя маглі не толькі гута- рыць паміж сабой, але і пазнаёміцца з арыгінальнай і для многіх карыснай інфармацый, былі запрошаны спікеры. Псіхолаг Галіна Бушмакіна і касметолаг Таццяна Каратцова расказалі шмат цікавага са сваіх галін ведаў, усім спадабаўся і фэшн-паказ, які падрыхтавала стыліст Караліна Гарашчэня.
Гасцей забаўлялі мімы з гарадскога маладзёжнага цэнтра, а салісты РЦК дарылі прысутным свае лепшыя музычныя нумары. Асобным мастацкім акцэнтам гэтага цудоўнага вечара стала захапляльнае танга, якое па-майстэрску выканалі работнікі РЦК Аляксей Навумовіч і Караліна Гарашчэня.

Аб сваёй рабоце расказвае касметолаг Таццяна Каратцова

Па водгуках удзельнікаў “Дамскага вечара”, яны з радасцю акунуліся б ізноў у яго цудоўную атмасферу. А гэта значыць, што першая спроба сталася паспяховай, і ў будучыні вечары такога кшталту, аб’яднаныя якой-небудзь іншай цікавай тэмай, стануць папулярнымі ў несвіжан і гасцей горада.
Соф’я ЛЮБАНЕЦ.
Фота Святланы ПОЛЬСКАЙ.