Нясвіжскія навіны ЗА ЗДАРОВЫ ЛАД ЖЫЦЦЯ
У мінулую суботу сярод работнікаў філіяла “Нясвіжскае УМГ ААТ “Газпром трансгаз Беларусь” прайшлі спаборніцтвы па спартыўнай лоўлі рыбы, прымеркаваныя да надыходзячага прафесійнага свята — Дня работнікаў нафтавай,
газавай і паліўнай прамысловасці.
Надвор’е выдалася цудоўным — больш за 100 удзельнікаў, сярод якіх былі не толькі працаўнікі філіяла, але і іх сем’і, і пенсіянеры арганізацыі, атрымалі вялікую асалоду ад свежага паветра і цёплага сонейка, што адбівалася ў водным люстэрку адной з сажалак ААТ “Альба”, дзе і праходзілі спаборніцтвы. Спартыўная рыбалка яскрава паказала, што занятак гэты цікавы людзям усіх узростаў, ад малога да вялікага.
Сёлета гэтыя спаборніцтвы, якія ўжо не першы год праводзяцца ў Нясвіжскім УМГ, сталі міжкаманднымі: акрамя саміх арганізатараў, іх калег з філіяла “Упраўленне “ЭКАГАЗ” ААТ “Газпром трансгаз Беларусь” і філіяла “Інжынерна-тэхнічны цэнтр” ААТ “Газпрам трансгаз Беларусь”, у іх прынялі ўдзел і работнікі ААТ “Гарадзейскі цукровы камбінат”.
Рыбаловы-аматары спаборнічалі ў намінацыях “Самы клёвы рыбак”, “Камандны ўлоў”, “Самая вялікая рыба”.
У выніку “самымі клёвымі рыбакамі” былі названыя ўсе шасцёра самых юных рыбакоў — дзяцей дарослых удзельнікаў спаборніцтва. У намінацыі “Камандны ўлоў” узнагароды атрымалі капітаны каманд усіх вышэйназваных прадпрыемстваў. І ў намінацыі “Самая вялікая рыба” першае месца заваяваў інжынер па электрахімічнай абароне лінейна-эксплуатацыйнай службы Уладзіслаў Сухадольскі, які вылавіў рыбіну вагой 1850 грамаў. Яму крыху саступіў аператар газаразмеркавальнай станцыі Дзмітрый Папок (вага рыбы — 1700 г) і ІІІ месца ў гэтай намінацыі заняў пенсіянер Іван Галубовіч, улоў якога склаў 1350 грамаў.
Па выніках спаборніцтваў удзельнікі былі ўзнагароджаны граматамі і грашовымі прэміямі.
Соф’я ЛЮБАНЕЦ.
