Горячие новости

У рамках мерапрыемства Гранд-Кірмаш прайшоў фестываль фарбаў, фларыстыкі і кветак “Кветкі Палаца”

Трэцяга верасня ўнутраны дворык Нясвіжскага замка прыняў у сябе фестываль фарбаў, фларыстыкі

і кветак “Кветкі Палаца” ў рамках мерапрыемства

Гранд-Кірмаш. Удзельнікамі сталі прафесіянальныя

і пачынаючыя фларысты з розных гарадоў Беларусі

і не толькі. Мы пабывалі на свяце, якое адбылося ўпершыню, і раскажам, якім яно атрымалася.

 

 

 

Распачаўся фестываль з сярэдневяковых танцаў — паланэза, вальса, полькі і іншых. Адначасова быў дадзены старт Кубку Нясвіжскага палаца па прафесійнай фларыстыцы 2022 года, які прайшоў у два этапы. Першы — спаборніцтва ў намінацыі “Сучасны галаўны ўбор для госці палаца”, другі — стварэнне букета на дэкаратыўным каркасе для гістарычнай асобы з роду Радзівіл, які яе характарызуе. 10 прадстаўленых работ (у адпаведнасці з колькасцю ўдзельнікаў) ацэньвала кампетэнтнае журы — і колер, і кампазіцыю, і тэхніку, і ідэю. Затым гэтыя работы прадэманстравалі прысутным мадэлі з Мінскага мадэльнага агенства “Sigma” падчас паказу ў вячэрніх сукенках (ад беларускага мадэльера Аксініі Смірновай) і льняных касцюмах ад ЗАТ “Калінка”.

Асноўнымі арганізатарамі фестывалю выступілі ІП Рыбалка, Нацыянальны гісторыка-культурны музей-запаведнік “Нясвіж”, генеральным партнёрам стала Мінская школа фларыстыкі “Minsk Flower School”.

— Фларысты, яны ж такія людзі, ім адно несці прыгажосць! Таму, калі ў наступным годзе мы знойдзем падтрымку, абавязкова прыедзем ізноў, — падзялілася ўражаннямі адна з куратараў мерапрыемства Святлана Сінцэрава. — Ведаеце, любому фларысту хочацца, каб яго работу ўбачылі і ацанілі як мага больш людзей. Бо гэта шчасце, калі ад выніку тваіх намаганняў нехта атрымлівае асалоду!

Над афармленнем дэкору два месяцы працавалі педагогі вышэйназванай школы — збіралі мясцовыя расліны (мячэўнік, камыш, сланечнік і інш.), а таксама стваралі канструкцыі і кампазіцыі з імпартных кветак (іх было выкарыстана каля 50 відаў).

Таксама ў рамках восеньскага кірмашу ў дворыку замка былі размешчаны выставы-продажы вырабаў беларускіх рамеснікаў, прайшлі майстар-класы і замкавая экскурсія з элементамі тэатралізацыі “Па слядах апосталаў”.

Як вынік — атмасфера суботняга дня ў радавым гняздзе Радзівілаў панавала ў адпаведнасці з загаданай тэмай: палац, баль, раскоша і багацце нясвіжскіх земляў.

Дар’я ПІВАВАРСКАЯ.

Фота Дарыны МІТРАКОВАЙ.

Добавить комментарий

Ваш адрес email не будет опубликован.

Этот сайт использует Akismet для борьбы со спамом. Узнайте, как обрабатываются ваши данные комментариев.

error: Content is protected !!