У бягучым годзе ў Нясвіжскі раён прыбылі 25 маладых спецыяліста.
З іх дзевяць — урачы (псіхіятр-нарколаг, псіхатэрапеўт, тры акушэры-гінеколагі, неўролаг, педыятр, отарыналарынголаг і ўрач агульнай практыкі), а таксама 16 медыцынскіх работнікаў з сярэдняй спецыяльнай медыцынскай адукацыяй (тры акушэркі ў акушэрскае аддзяленне, Гарадзейскую ГБ і Сноўскую амбулаторыю, тры фельчары-лабаранты, шэсць медыцынскіх сясцёр у педыятрычнае, уралагічнае, тэрапеўтычнае аддзяленне Гарадзейскай ГБ, Лявонавіцкую амбулаторыю, фельчар у аддзяленне прафілактыкі, тры памочнікі ўрача па амбулаторна-паліклінічнай дапамозе ў Лявонавіцкую амбулаторыю, Гарадзейскую і перасоўны медыцынскі комплекс). За маладымі спецыялістамі абавязкова замацоўваюцца дасведчаныя настаўнікі.
Немалаважна адзначыць, што, каб заматываваць маладых спецыялістаў, тут прадпрымаюцца пэўныя захады. Напрыклад, надбаўка пры заключэнні кантракту, дадатковыя заахвочвальныя дні да водпуску да 5 дзён, надбаўка за складанасць і напружанасць працы, надбаўкі маладым спецыялістам на ўвесь перыяд абавязковага тэрміну адпрацоўкі, пакрыццё платы за арэнду жылля, прадастаўленне інтэрната.
Таксама з маладымі спецыялістамі праводзяцца сустрэчы, злёты “Уводзіны ў прафесію”, на якіх вырашаюцца праблемныя пытанні, маладых медыкаў прыцягваюць удзельнічаць у грамадскай дзейнасці, культурных і спартыўных мерапрыемствах.
Аб тым, як уладкаваліся на новых працоўных месцах маладыя спецыялісты, мы спыталі непасрэдна ў іх саміх.
Ганна Скрабец скончыла Слуцкі дзяржаўны медыцынскі каледж па спецыяльнасці “Лячэбная справа”. Хаця сама дзяўчына не мясцовая — са Столінскага раёна Брэсцкай вобласці, але па размеркаванні прыехала на Нясвіжчыну, бо менавіта ад Нясвіжскай ЦРБ брала мэтавае накіраванне пры паступленні. Ганна кажа, што заўсёды марыла быць медыкам, таму, калі надышоў час вызначаць будучы шлях, не раздумывала і адразу вырашыла, куды пойдзе.
Са жніўня Ганна працуе памочнікам урача ў Лявонавіцкай амбулаторыі. Калектыў там невялікі — 7 чалавек, але вельмі дружны і цёпла прыняў маладога спецыяліста. Асноўныя абавязкі дзяўчыны — вакцынацыя насельніцтва, правядзенне рознага кшталту абследванняў, назіранне за дзецьмі, накіраванне хворых на абследванне ў ЦРБ і так далей. З гэтым памочнік урача стараецца спраўляцца якасна і добрасумленна. Кажа, што з людзьмі працаваць цікава, бо ўсе яны розныя і ўсе патрабаюць увагі і дапамогі.
— Умовы вельмі добрыя, мяне ўсё задавальняе, — кажа Ганна, — цэнтральная бальніца прадастаўляе мне жыллё ў Нясвіжы, а таксама арганізавала падвоз да работы і назад. І працаваць мне падабаецца. Думаю, пяць гадоў адпрацоўкі праляцяць непрыкметна.
Задаволена сваёй работай і ўрач агульнай практыкі паліклінікі Алена Яроцкая. Яна скончыла Віцебскі медуніверсітэт па спецыяльнасці “Лячэбная справа”. Дзяўчына мясцовая, таму інтэрнатуру і адпрацоўку вярнулася праходзіць на малую радзіму.
— Калектыў мяне прыняў добра, ветліва. Калі ўзнікаюць пытанні, абавязкова дапамагаюць, падказваюць, накіроўваюць і даюць парады. З гэтым мне пашанцавала.
Алена гаворыць, што складаней за ўсё аказалася менавіта работа з людзьмі. Акрамя таго, нагрузка немалая: і звычайны прыём, і стацыянар, і выезды па выклікам. Але маладога ўрача не крыўдзяць: прадастаўляюць рознага кшталту прэферэнцыі.
— Тут мяне ўсё задавальняе, усё падабаецца, таму, думаю, замацуюся тут як спецыяліст.
Дар’я ПІВАВАРСКАЯ.