Запрашэнне ў калядную казку

Дзверы ў калядную казку ізноў адчыніліся ў Нясвіжскім замку, дзе ў адной з самых чароўных яго залаў — Бальнай — ужо ў трэці раз адбылося ўрачыстае адкрыццё часовай экспазіцыі “Звяжам свет прыгажосцю”.

На ёй прадстаўлены сучасныя калядныя цацкі, упрыгожаныя ў тэхніцы ірландскіх карункаў і вырабленыя ў рамках міжнароднага конкурсу ёлачнай цацкі.




Запрашэнне ў калядную казку
Сваю цацку на святочную ёлку вешае
адна з пераможцаў конкурсу “Звяжам свет прыгажосцю” Святлана Грышына

Майстры, якія паўдзельнічалі ў ім, даслалі свае работы з нашай краіны, а таксама з Расіі, ЗША і Канады. Многія з іх — члены міжнароднай школы аматараў ірландскіх карункаў, якая дзейнічае пад кіраўніцтвам аўтара міжнароднага праекта і заснавальніка школы, нашай зямлячкі Вольгі Старасцінай.

Вольга Аляксандраўна ўжо знаёма пастаянным чытачам “НН”, але для тых, хто чытае нашу газету ўпершыню, нагадаем, што яна стварае кручком калекцыйныя работы класа “люкс” у старадаўняй тэхніцы ірландскіх карункаў. Зарэгістраваная з 2016 г. у Міжнароднай Арганізацыі Майстроў Карункаў, майстрыха ўдзельнічае ў шматлікіх міжнародных выставах, выдала ўласны часопіс аб сучасных ірландскіх карунках. Яе работы атрымалі высокую адзнаку ад майстроў Каралеўскага двара Вялікабрытаніі.

Запрашэнне ў калядную казку
Адна з навінак выставы — падсвечнікі,
упрыгожаныя ірландскімі карункамі

Кожны год выстава “Звяжам свет прыгажосцю” радуе сваіх наведвальнікаў эксклюзіўнымі навінкамі. Вось і сёлета на ёй прадстаўлены не толькі ёлачныя цацкі, але і падсвечнікі, упрыгожаныя ірландскімі карункамі, і эксклюзіўныя арыгінальныя сукенкі, выкананыя ў гэтай старадаўняй тэхніцы. Госці выставы змаглі пераканацца на свае вочы ў тым, якія бязмежныя магчымасці маюць ірландскія карункі ў інтэрпрэтацыі таленавітых майстроў для стварэння непаўторнага сучаснага дэкору.
Як патлумачыла сама Вольга Старасціна, сёлета, паколькі ўсе прадстаўленыя на конкурс цацкі былі выкананы вельмі высока- якасна, вырашана было не вызначаць канкрэтныя месцы сярод пераможцаў, а проста ўзнагародзіць каштоўнымі падарункамі чатырох майстрых, якія іх стварылі. Гэта Любоў Шахімардаванава з Канады, Таццяна Зубрэвіч з Беларусі, Віялета Сіманава і Наталля Ганчарова з Масквы.

Запрашэнне ў калядную казку
Для ўдзельнікаў адкрыцця выставы іграе струнны квартэт Вялікага тэатра оперы і балета Рэспублікі Беларусь

Асобным мастацкім штрыхом выставы сталі карункавыя падсвечнікі.
— Традыцыя ўпрыгожваць карункамі лямпы была і да мяне, — адзначыла ў нашай гутарцы аўтар выставы. — Але паспрабаваць у ролі дэкору для крыніцы святла ірландскія карункі я вырашыла ўпершыню. Як гэта атрымалася, трэба запытацца ў гледачоў, але адно магу сказаць з упэўненасцю: і я, і мае сяброўкі па захапленні пастраліся ўкласці ў свае вырабы ўсё сваё майстэрства і любоў да прыгожага.

Запрашэнне ў калядную казку
Вольга Старасціна дэманструе адну з цацак-пераможцаў

Мяркуючы па ўсім, ім цалкам гэта ўдалося. Вольга Старасціна адзначыла і той момант, што на сёлетняй выставе гледачы могуць убачыць ужо палову праекта “Поры года”, які заключаецца ў стварэнні эксклюзіўных сукенак — сімвалаў гэтых самых пораў года. Так, летась увазе публікі была прадстаўлена сукенка “Вясна”, у якую ўвайшло 50 адценняў зялёнага колеру, а на гэты раз гледачы маглі ўжо палюбавацца на сукенку “Лета”, нібыта сабраную з разнастайных кветак, колькасць колераў якіх ніхто ўжо не бярэцца падлічваць. У стварэнні гэтага ўбора ўдзельнічалі майстрыхі з Беларусі, Расіі, Польшчы і Канады, што сапраўды сведчыць пра паяднанне свету праз творчасць і прыгажосць.


Запрашэнне ў калядную казку
Другая сукенка з праекта
“Поры года” — “Лета”

На наступны год аматараў творчасці Вольгі Старасцінай і яе калег “па цэху” чакае сукенка “Восень”, і ў 2024-м годзе завершыць калекцыю эксклюзіўных строяў “Зіма”. Усе сукенкі ствараюцца па адной тэхналогіі — асобныя іх дэталі вырабляюць майстрыхі з розных краін, дасылаюць іх Вользе, і яна ўжо злучае атрыманыя частачкі ў адзінае цэлае.
Перспектыва ўбачыць гэты рукатворны цуд натхніла ўсіх удзельнікаў урачыстага адкрыцця выставы. Увесь наступны год яны з нецярпеннем будуць чакаць сустрэчы з прыгажосцю, якая сапраўды злучае свет і будуе нябачныя, але трывалыя масты ад сэрца да сэрца і ад народа да народа.
Для тых, хто яшчэ не пабываў у замку Радзівілаў на выставе “Звяжам свет прыгажосцю”, нагадаем, што яна будзе дзейнічаць да 20 студзеня. Не прапусціце!
Соф’я ЛЮБАНЕЦ.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.

error: Копирование защищено!!!