Инна ВАСИЛЕВИЧ Узорны танцавальны калектыў “Онікс” Нясвіжскай дзіцячай школы мастацтваў прыняў удзел у нацыянальным адборачным туры ХХХІІ Міжнароднага фестывалю мастацтваў “Славянскі базар у Віцебску”. На суд журы 5-га Міжнароднага танцавальнага праекта Drem Dance Fest былі прадстаўлены беларускія народныя танцы “Крутуха” і “Верабейка”. Калектыў стаў прызёрам конкурсу і прывёз у Нясвіж дыпломы лаўрэатаў.
— Дзеці з задавальненнем прынялі ўдзел у чарговым мерапрыемстве рэспубліканскага маштабу, — падкрэсліла кіраўнік калектыву Кацярына Лабаза. — І мы не мяняем напрамку сваёй творчасці. Беларускія танцы вызначаюцца самабытнасцю, а гэта больш за ўсё падабаецца калектыву. Кожны танец — часцінка культуры нашага народа, у ім захоўваюцца нацыянальныя рысы. Сваім выступленнем мы кожны раз хочам падкрэсліць, што мы — беларусы, і што знаёмства з беларускай харэаграфіяй важнае для разумення вытокаў усёй культуры краіны. І не толькі для нашага падрастаючага пакалення, але і для дарослага гледача.
Ужо сёння “Онікс” рыхтуецца прыняць удзел у новых праектах міжнароднага маштабу. Гэта фестываль дзіцячай творчасці “Залатая пчолка” ў Клімавічах, які па традыцыі аб’ядноўвае да пяцісот удзельнікаў з Беларусі, Расіі, Арменіі, Казахстана, Кыргызстана, Узбекістана. Сёлета ён будзе юбілейны, дваццаты.
Рыхтуюць юныя выхаванцы Кацярыны Лабазы і відэаматэрыялы да заяўкі на ўдзел у Міжнародным фестывалі “Масква сустракае сяброў”, які з’яўляецца самым маштабным праектам Міжнароднага дабрачыннага фонда Уладзіміра Співакова, які штогод праходзіць на лепшых канцэртных і выставачных пляцоўках Масквы і Маскоўскай вобласці. За дваццаць гадоў у фестывалі прынялі ўдзел каля 45000 маладых талентаў. У 2023 годзе ён пройдзе пад дэвізам “Юбілейны”.
Дык няхай і далей нашы юныя танцоры “Крутухаю”, “Крыжачком”, “Верабейкаю” і іншымі творамі дораць гледачу пазітыў, энергію, жыццярадаснасць.
Іна ВАСІЛЕВІЧ.
